Մինչ Ուկրաինան հրաժարվում է ԵՄ-ի հետ ավելի սերտ հարաբերություններից, Օբամայի վարչակազմը զերծ է մնում այդ հարցով «շատ խոսելուց»՝ մտավախություն ունենալով խարխլել Կրեմլի հետ հարաբերությունները՝ գրում է The Washington Post-ը:
Ուկրաինայի մայրաքաղաքում զանգվածային ցույցերը Վաշինգտոնը մեկնաբանում է չափավոր և խուսափողաբար՝ գրում է պարբերականը՝ նշելով, որ վերջին ժամանակներս Ռուսաստանն ԱՄՆ-ի գործընկերն է Սիրիայի քիմիական զենքի և Իրանի միջուկային ծրագրի հետ կապված դիվանագիտական գործարքի շրջանակներում:
Թերթի տեղեկությամբ՝ ԱՄՆ պետքարտուղար Ջոն Քերին ՆԱՏՕ-ի շտաբ-բնակարանում մամուլի ասուլիսը բացել է Ուկրաինայի կառավարության և ընդդիմության համատեղ աշխատանքի կոչով՝ երկիրը եվրաինտեգրման և տնտեսական առողջացման ուղի վերադարձնելու համար:
Հարցին՝ ինչո՞ւ ԱՄՆ-ի արձագանքն ավելի կտրուկ չէր, Քերին պատասխանել է, որ Ուկրաինան ի վիճակի է ինքնուրույն կատարել իր ընտրությունը, որը պետք է արտահայտի ժողովրդի կամքը: Նրա խոսքով՝ Յանուկովիչն ընդունել է «անհատական որոշում», որին կողմ չէ ժողովուրդը:
ԱՄՆ-ը վաղուց աջակցում է եվրոպական կողմնորոշում ունեցող Ուկրաինային՝ այն դեպքում, երբ Կրեմլը շահագրգռված է նախկին ԽՍՀՄ տարածքները Մոսկվայի տնտեսական ծիրի մեջ ներգրավելով՝ նշում է պարբերականը:
