Այսօր՝ ապրիլի 17-ին, ԱԺ-ում հրավիրվել է հատուկ նիստ՝ քննարկելու Սերժ Սարգսյանի թեկնածությունը ՀՀ վարչապետի պաշտոնում:
«Ելք» խմբակցության պատգամավոր Գևորգ Գորգիսյանը, անդրադառնալով ՀՀԿ-ականների ելույթներին, թե՝ շատ բնական է, երբ վարչապետի թեկնածու է լինում մեծամասնություն ունեցող քաղաքական ուժի առաջնորդը, ասաց. «Բայց բնական է նաև, որ այդ անձը գլխավորի նախընտրական ցուցակը՝ ցույց տալու ժողովրդին, թե ինչ է իրեն սպասվում ընտրություններից հետո: Բայց ձեր դեպքում, պարոնայք, ձեր առաջնորդը թաքնվել էր այլ անձանց թիկունքում»:
Դիմելով Սերժ Սարգսյանին՝ պատգամավորն ասաց. «Դուք այդպես էլ չունեցաք քաղաքական կայացած ուժին բնորոշ կարևոր հատկանիշները՝ հաշվետվողականություն, հասանելիություն և հետևողականություն: Ձեր քաղաքական գործունեությունը կարելի է բնութագրել մեկ բառով՝ կիսատ»:
Գևորգ Գորգիսյանը Սերժ Սարգսյանին մեղադրեց ծառացած բոլոր խնդիրների համար. «Դուք մեղավոր եք, որ Հայաստանում ամեն երրորդ մարդ աղքատ է, ամեն 5-րդը՝ գործազուրկ, և բոլորը անխտիր պարտք են բանկերին: Մեղավոր եք, որ 30 տարի անց մենք դեռ ունենք աղետի գոտի: Մեղավոր եք, որ հասարակությունում կա ծայրաստիճան բևեռացում և անարդարության զգացում, որ ՀՀ քաղաքացիներն ունեն 7 մլրդ դրամ պարտք: Մեղավոր եք, որ ՀՀ քաղաքացիները լքում են Հայաստանը»:
Նրա խոսքով՝ անվտանգության համար պետք է ներքին կայունություն, իսկ վերջինիս համար պետք է, որ կայանա քաղաքական համակարգը. «Հզոր բանակի համար պետք է հզոր տնտեսություն, իսկ մենաշնորհային տնտեսությունը չի կարող լինել հզոր, դրա համար պետք են ազատական շուկայական հարաբերություններ, արդար դատական համակարգ, իսկ դրա համար՝ քաղաքական կամք»:
Գևորգ Գորգիսյանը խոստացավ, որ իրենք միշտ լինելու են ԱԺ-ում և միշտ ներկայացնելու են իրենց տարբերվող մոտեցումները. «Ու մեր ամենօրյա աշխատանքով մոտեցնելու ենք այն օրը, որ ձեր անսասան համակարգը գա իր անխուսափելի վախճանին»:
Մանրամասները՝ տեսանյութում:
