Վիեննայում նոյեմբերի 19-ին Հայաստանի նախագահ Սերժ Սարգսյանի և Ադրբեջանի նախագահ Իլհամ Ալիևի հանդիպումից հետո ԵԱՀԿ Մինսկի խմբի համանախագահների տարածած հայտարարությունում հաղորդվում է, որ երկու երկրների նախագահները համաձայնել են խթանել խաղաղ կարգավորման ձեռքբերմանն ուղղված հետագա բանակցությունները և հանձնարարականներ են տվել իրենց արտաքին գործերի նախարարներին:
Սահմանամերձ գյուղերը մշտապես խաղաղության, անվտանգության մասին են երազում, սակայն, չեն շտապում ուրախանալ հանդիպման արդյունքներով: «Առաջին լրատվական»-ի հետ զրույցում Այգեպարի գյուղապետ Անդրանիկ Այդինյանը նշեց, որ առանձնապես սպասելիքներ չունի: «Իմ պապերը գիտե՞ս ինչ են ասել, ասել են՝ թուրքի հետ ընկերություն արա, բայց փետը ձեռքիցդ մի գցի: Հիմա մենք ո՞նց կարանք վստահ լինենք, որ էն ախմախը չի կրակելու կամ որ ինչ-որ վտանգ չի լինելու: Նրանց մոտ գիտե՞ս ինչ ա կատարվում. փոքր երեխաներին սովորեցնում են, որ հայերը իրենց թշնամիներն են: Մանկապարտեզից, դպրոցից սկսած՝ բոլորին սովորեցնում են»,- ասաց նա՝ հավելելով, որ ժամանակը ցույց կտա:
Տավուշի մարզի Չինարի գյուղի ղեկավար Սամվել Սաղոյանը նշեց, որ Չինարիում առայժմ հանգիստ դրություն է, հակառակորդը չի անհանգստացնում, կրակոցներ չկան: Անդրադառնալով նախագահների հանդիպմանն ու դրա արդյունքներին՝ Սաղոյանը միայն ասաց, որ իրենք հավատ ունեն ապագայի հանդեպ: «Մենք հավատով լիքը ժողովուրդ ենք, ապագային հավատում ենք, լավատես ենք, որ ամեն ինչ լավ կլինի, խաղաղություն կլինի: Հենց էդ հավատով ենք ապրում: Եթե այդ հավատը չլիներ, այստեղ չէինք լինի, հիմա վաղուց էինք դուրս եկել այստեղից»,- ասաց նա:
Տավուշի մարզի սահմանամերձ Վազաշեն գյուղում ևս խաղաղ, հանգիստ վիճակ է: Գյուղապետ Լորիկ Բադիրյանն ասաց, որ եթե բանակցությունների ընթացքում դրական արդյունքներ լինեն, դա բավական դրական ազդեցություն կթողնի թե՛ իրենց հարաբերությունների, թե՛ ապրելակերպի ու սահմաններում կայունության վրա: «Բնականաբար, մենք խաղաղության կարիքը խիստ ունենք, բարիդրացիական հարաբերությունների կարիքն ունենք: Համոզված եմ, որ սա դրական քայլ էր: Թե ինչպես կլինի ընթացքը, չեմ կարող ասել, կարող եմ միայն իմ ցանկությունը հայտնել, որ խաղաղություն լինի, սահմաններն ամուր լինեն, անգամ թշնամու հետ ինչ-որ տեղ համագործակցություն եմ ցանկանում»,- ասաց նա: Հարցին՝ «թշնամու հետ համագործակցություն» ասելով՝ ի՞նչ նկատի ունի, Բադիրյանը պատասխանեց. «Այն, որ անվտանգ լինի, խաղաղ, գյուղացին հանգիստ կարողանա աշխատի, իր հողը մշակի, իր կյանքը վայելի՝ գոնե փոքր-ինչ մարդավարի»:
Ներքին Կարմիրաղբյուրի գյուղապետ Մանվել Կամենդատյանն ասաց, որ գյուղում իրավիճակի փոփոխություն առանձնապես չկա, ինչպես նախկինում էր, հիմա էլ նույնն է: Կարմիրաղբյուրը ևս ցանկանում է օր առաջ ունենալ ամուր, անվտանգ սահմաններ: «Սահմանամերձ գյուղերին շուտափույթ պետք է դա: Սահմանում ապրելը խաղ չի, մրցույթ չի, պատերազմ չի, բանակն ուրիշ է: Սահմանամերձ գյուղում ապրողի համար հարցի շուտափույթ լուծում է պետք. ամեն մի վայրկյանը կարևոր է, ամեն վայրկյանը մեծ նշանակություն ունի: Ժողովուրդը դրան ոչ թե պարզապես սպասում է, դա կարևորագույն, առաջնահերթ հարցն է մեզ համար»,- ասաց նա:
Բարեկամավան համայնքի ղեկավար Գագիկ Աբազյանը նշեց, որ գյուղում իրավիճակը նորմալ է, կրակոցներ չկան: Անդրադառնալով նախագահների հանդիպմանն ու բանակցություններին նոր թափ հաղորդելու պատրաստակամության մասին հայտարարությանը՝ գյուղապետը միայն ասաց. «Տա Աստված… ինչ ասեմ, չգիտեմ»:
