Ուղղափառ մեկենասների ռուսական ակումբի նախաձեռնությամբ այսօր Ռուսական արվեստի թանգարանում բացվեց «Մկրտության սրբապատկեր. պատմություն և արդիականություն» խորագրով ցուցահանդեսը և մեկնարկեց «Մկրտության սրբապատկեր» խորագրով լայնածավալ տեղեկատվական և կրթական ծրագիրը:
Մինչև ցուցահանդեսը կազմակերպիչները լրագրողների հետ հանդիպմանը խոսեցին նախաձեռնությունից, ինչպես նաև՝ բարեգործական ակցիայից, որի ողջ հասույթը կուղղվի Գյումրիում գիշերօթիկ դպրոցի կապիտալ վերանորոգմանը՝ 107 անապահով ընտանիքների երեխաներին կացարանով ապահովելու նպատակով:
Ասուլիսի ընթացքում «Ուղղափառ մեկենասների ռուսական ակումբ» համառուսաստանյան հասարակական կազմակերպության հիմնադիրներից Անդրեյ Պոկլոնսկին նշեց, որ մի քանի տարի առաջ սրբապատկերների թիվը շատ քիչ էր, իսկ այժմ ցուցադրվում են այնպիսի սրբապատկերներ, որոնք մինչ այժմ ոչ միայն Ռուսաստանից դուրս չէին եկել, այլև հանրությունը դրանց մասին քիչ բան գիտեր. «Հայաստանում այսօր եզակի հնարավորություն է՝ տեսնել այնպիսի սրբապատկերներ, որոնք ուրիշ ոչ մի տեղ չեն եղել»:
Ինչպես փաստեց նա, այս նախագծի շնորհիվ վերականգնվել է 300 տարի առաջ գոյություն ունեցած և մեր ժամանակներում մոռացված մի շատ գեղեցիկ ռուսական ավանդույթ, այն է՝ նորածնի մկրտության կապակցությամբ նրա հասակի և ուսերի լայնությանը համապատասխան սրբապատկեր ստեղծել. «Ժամանակակից աշխարհում 300 տարի առաջ մոռացված ավանդույթը վերականգնելը նույնն է, ինչ նոր ավանդույթ ստեղծելը: Եվ դա ողջունելի է ոչ միայն ավանդույթը վերականգնելու, այլ նաև այն առումով, որ շուրջ 9000 նկարիչ այսօր աշխատանք ունի»:
Շարժական ցուցահանդեսն անցկացվում է 2005 թվականից սկսած՝ ՌԴ արտաքին գործերի նախարարության հովանավորությամբ, և արժանացել է Ամենայն հայոց Կաթողիկոս Գարեգին Բ-ի օրհնանքին։
