Հայաստանում հոկտեմբերի 1-ի դրությամբ ապրում է 3 մլն 17 հազար մարդ: Սա ըստ Ազգային վիճակագրական ծառայության: Բնակչության հիմնական մասն ավանդաբար կենտրոնացված է մայրաքաղաքում: Ավելի քան 1/3-ը՝ 1 մլն 67 հազար 200 մարդ ապրում է հենց Երևանում:
Իհարկե այս թվերը լավատեսական են և այնքան էլ իրական չեն: Քանի որ բնակչության թվաքանակի ընթացիկ գնահատականը տրվում է բնակչության վերջին մարդահամարի արդյունքների հիման վրա (2011թ. հոկտեմբերի 12-21-ն անցկացված): Այդ տվյալներին ամեն տարի ավելացվում են տվյալ տարածքի ծնվածների և եկողների թիվը, հանվում են մահացածների և տվյալ տարածքից մեկնածների թվաքանակը: Ծնվածների և մահացածների մասին տեղեկությունները ստացվում են ծննդյան և մահվան վերաբերյալ ակտերի հիման վրա, իսկ բնակչության միգրացիայի տվյալները՝ Ոստիկանության անձնագրային և վիզաների վարչությունից:
Սակայն հաշվի առնելով այն հանգամանքը, որ հաշվառման կանգնելու և հաշվառումից դուրս գրվելու գործառույթներն ուղղակիորեն կախված են քաղաքացինների կամքից, և որպես դրա հետևանք, այդ կարգի գրանցումները միգրացիոն տեղաշարժերի ամբողջական պատկերը չեն արտացոլում, այդ ցուցանիշներն այժմյան ճշգրիտ պատկերը չեն արտացոլում:
Ամեն ամիս Հայաստանից հեռանում են և չեն վերադառնում հազարավոր մարդիկ: Միայն այս տարվա առաջին 9 ամիսներին երկրից հեռացել ու չի վերադարձել 42 հազար 286 մարդ: Այնպես որ ավելի քան 3 մլն բնակչության մասին խոսելն ուղղակի անհեթեթ է:
