Ներկայացնում ենք «Առավոտ» օրաթերթի գլխավոր խմբագիր Արամ Աբրահամյանի այսօրվա խմբագրականից հատված:
Ի տարբերություն Վրաստանի և Մոլդովայի, որոնք նոյեմբերի 28-29-ին Վիլնյուսում պետք է Եվրամիության հետ նախաստորագրեն Ասոցացման համաձայնագիրը (մենք էլ այդպիսի հնարավորություն ունեինք, բայց սեպտեմբերի 3-ին դրանից հրաժարվեցինք), Ուկրաինան այդ փուլն արդեն անցել էր, և այդ համաձայնագիրը որ պետք է ստորագրեր: Այս շաբաթվա ընթացքում դրա վերաբերյալ կասկածներ առաջացան:
Ամեն ինչ սկսվեց չորեբշաբթի օրը, երբ Ուկրաինայի Գերագույն Ռադան, հավաքվել էր արտահերթ նիստի և պետբ է «վերջին շտրիխները» մտցներ «եվրոպամետ» օրենքներում: Օրենքների փոփոխություններից երկուսը «ընդհանուր բնույթի» էին և վերաբերում էին դատախազությանն ու ընտրություններին՝ այս օրինագծերն առանձնապես առարկությունների չէին հանդիպում: Սակայն կռվախնձորը օրենքի նախագիծն էր, որը առավելագույնը պետք է ներում շնորհեր Յուլյա Տիմոշենկոյին, իսկ եթե ոչ՝ առնվազն պետք է հնարավորություն տար Ուկրաինայի նախկին վարչապետին բուժվել արտասահմանում: ԵՄ-ի համար այդ հարցը սկզբունքային է՝ մի մտածեք, որ միայն Ռուսաստանն իր կամակորություններն ունի՝ եվրոպական չինովնիկներն ու լիդերները նույնպես սիրում են երբեմն երկու ոտքը դնել մի կոշիկի մեջ:
Սակայն Ռադայի նիստը չկայացավ, «հանկարծ» պարզվեց, որ «Ռեգիոնների կուսակցությունը» (նրանց ՀՀԿ-ն) որոշել է նիստը տապալել, հավանաբար «իշխանության կուսակցություններն» ամենուր այդպիսի սովորություն ունեն: Ուկրաինայի նախագահ Յանուկովիչն էլ սկսեց մշուշոտ զրույցներ վարել այն մասին, որ իր երկրի տնտեսությունը սերտորեն կապված է Ոուսաստանի հետ, որ իր գործարանների արտադրանքը չի համապատասխանում եվրոպական ստանդարտներին՝ կարծես այդ հայտնագործությունը նա նոր է արել: Արդյոք դա նշանակո՞ւմ է, որ Ուկրաինան ԵՄ-ի հետ համաձայնագիր չի ստորագրի, թե՞ Յանուկովիչը պարզապես եվրոպացիներից հավելյալ փողեր է ուզում՝ դժվար է ասել: Փոխարենը հայտնի է, որ հոկտեմբերի 27-ին և նոյեմբերի 9-ին Յանուկովիչը երկարատև զրույցներ է ունեցել Պուտինի հետ:
Խմբագրականն ամբողջությամբ՝ կարդացեք «Առավոտ» օրաթերթի այսօրվա համարում:
