Ամերիկյան հատուկծառայությունների կողմից իրականացված էլեկտրոնային լրտեսման շուրջ առաջացած համաշխարհային իրարանցումը հանգեցրել է նրան, որ համացանցի անգլալեզու հատվածում այս տարի ամենից հաճախ կիրառվող բառերի ու անունների ցուցակում են հայտնվել «Ազգային անվտանգության գործակալությունն» ու«Էդվարդ Սնոուդենը»: Այս մասին հայտնում է Russia Today-ը:
Ավանդական վարկանիշը կազմել է The Global Language Monitor վերլուծական գործակալությունը: Ամենահայտնին ոչ թե բառ է, այլ թվերի համադրություն՝ «404», որը հայտնում է համացանցային էջի անհասանելիության մասին:
Երկրորդ տեղում է հայտնվել fail (ձախողում) բառը: Վարկանշային քսանյակի մեջ են հայտնվել նաև «փակուղի», «դեֆիցիտ», «ծովահեն» և «կեղծ» բառերը, ինչպես նաև «ուսումնասիրություն և վերահսկողությունը»: Հատկանշական է, որ 2012-ի ամենից շատ կիրառված բառերը եղել են «ապոկալիպսիսն» ու «Արմագեդոնը»:
Համացանցի անգլալեզու հատվածում մեծ ժողովրդականություն են վայելում Հռոմի պապն ու նրա առցանց գործունեությունը: @Pontifex հեշթեգը հայտնվել է հայտնի բառերի 4-րդ հորիզոնականում, իսկ Ֆրանցիսկոսը առավել հիշատակված անձնական անունների շարքում հայտնվել է առաջին տեղում:
Արտահայտությունների շարքում առաջատար է Toxic politics-ը, որը նշանակում է կոշտ քաղաքական պայքարի անազնիվ մեթոդներ: Շարքում թվարկվում են նաև«գլոբալ տաքացում», «պետական դեֆիցիտ», «քիմիական զենք», «պայթյուն մարաթոնին» արտահայտությունները:
