Փաստաբան Լուսինե Սահակյանը ֆեյսբուքյան իր էջում գրառում է կատարել՝ նշելով.«Հետաքրքիր է, թե ի՞նչ գործ կարող է ունենալ հանցավոր համագործակցության ղեկավար Վահագն Աբգարյանի մտերիմ, նույն ինքը ոստիկանապետ Վովա Գասպարյանի եղբայր` Կարեն Գասպարյանը Նուբարաշեն ՔԿՀ-ում»,-գրել է փաստաբանը։
Նշենք, որ Վլադիմիր Գասպարյանի եղբայրը՝ Կարեն Գասպարյանը ՀՀ Տրանսպորտի, կապի և տեղեկատվական տեխնոլոգիաների նախարարությունում Տրանսպորտի վարչության պետ է աշխատում։
Թե ինչ կապ ունի նա քրեական հեղինակություն Ալավերդցի Վահագի հետ և արդյոք գնացել էր «Նուբարաշեն» ՔԿՀ նրան տեսնելու փորձեցինք ճշտել Վահագն Աբգարյանի փաստաբան Հակոբ Ճարոյանից։ «Բացառվում է, որ ձեր նշած անձը կարողանար տեսակցել Վահագն Աբգարյանին։ Վերջինիս կարող են տեսնել միայն նրա փաստաբանները և ԱԺ պատգամավորները։ Մնացած տեսակցությունների վրա քննիչը արգելանք է դրել»,-ասաց Ճարոյանը։
Մեր դիտարկմանը, թե նշված անձը հանդիսանում է ոստիկանապետի եղբայրը և դժվար է հավատալ, որ նրա նկատմամբ ևս կկիրառվեր տեսակցության արգելանքը,. Փաստաբանը պատասխանեց. «Կապ չունի։ Ով ուզում է լինի, ինչ հարաբերություն ուզում է ունենա Աբգարյանի հետ, բացառվում է, որ կարող էր տեսակցել նրան»։
Մեր հարցին, թե իսկապես մտերիմ են ոստիկանապետի եղբայրն ու Վահագն Աբգարյանը, Ճարոյանը պատասխանեց.«Չեմ կարող ասել։ Ես այդ տեղեկությանը չեմ տիրապետում»։
Հիշեցնեք, որ ալավերդցի Վահագն Աբգարյանը մեղադրվում է հանցավոր համագործակցություն ստեղծելու և սպանություն պատվիրելու մեջ։
