Ցանկացած հարկային եկամտի հիմքում պետք է դրված լինի շրջանառություն, և երբ որ մենք համեմատում ենք նախորդ տարվա հետ, պետք է համեմատենք նախորդ տարվա շրջանառությունները այս տարվա հետ։ Այդ մասին «Առաջին լրատվական»-ի հետ զրույցում նշեց ԱԺ փոխնախագահ, «Ծառուկյան» խմբակցության պատգամավոր Միքայել Մելքումյանը՝ անդրադառնալով այն փաստին, որ 2017 թվականին պաշտոնական թվերով մաքսային ու հարկային եկամուտներն աճել են ավելի քան 20 տոկոսով։
«Պետք է հաշվի առնել ներկրումների ծավալը, երբ սահմանի վրա գանձում են մաքսատուրք և ավելացված արժեքի հարկ, նաև պետք է նայել ներքին շրջանառությունները, որովհետև արտահանումն ազատված է հարկերից։
Ինչ վերաբերում է թվերին, ապա 2016 թվականին, ըստ էության, տնտեսական աճ չի եղել, իսկ այս տարի դեռ թվերը չկան, բայց խոսվում է 5-6 տոկոս տնտեսական աճի մասին։ Այստեղ պետք է նայել, թե 6 տոկոս տնտեսական աճը որքան լրացուցիչ հարկային եկամուտ է բերում բյուջե»,- ասաց նա։
Միքայել Մելքումյանի խոսքերով՝ եթե հաշվարկում ենք, ստացվում է, որ մեկ տոկոս տնտեսական աճի պարագայում հարկերը մոտ 100 մլրդ դրամի կարգի են աճել։ «Բացի այդ, 2017-ի համար որոշ օրենսդրական լուծումներ են եղել, որոնց հաշվին հարկային մուտքերը պետք է ավելանային։ Գուցե որոշ ոլորտներում ստվերային շրջանառությունը մի փոքր նվազել է։ Այդ թիվը պետք է համադրենք նաև դոլարի փոխարժեքի հետ, օրինակ՝ մեկ տարի առաջ փոխարժեքն ինչքան էր, ու հիմա ինչքան է։ Այնպես որ, այդ թվերի մեջ արտառոց ոչինչ չեմ տեսնում։ Ես կարծում եմ, որ այդ թվերը ոչ թե պետք է համեմատել 2016-ի հետ, այլ նրա հետ, թե ինչքան է ծրագրված եղել 2017-ի համար, և որքան է հավաքագրվել»։
