«Մեզ համար յուրաքանչյուր զինվորի կորուստը մեծագույն կորուստ է՝ պայմանավորված մեր բնակչության թվով, բանակի թվաքանակով, պատերազմական իրավիճակով»,- «Առաջին լրատվական»-ի հետ զրույցում ասաց քրեական արդարադատության հոգեբան Արշակ Գասպարյանը՝ անդրադառնալով 2017 թվականի ընթացքում զինված ուժերում արձանագրված մահվան դեպքերին։
Գասպարյանի խոսքով՝ ճիշտ չէ բանակում մահվան դեպքերը համեմատության մեջ դնել նախորդ տարվա դեպքերի հետ և ասել՝ դրանք շատ են, թե քիչ։ «Դա սխալ մոտեցում է։ Հանցագործությունն ու հանցավորությունը չի կարելի վերլուծել մեկ տարվա կտրվածքով։ Քրեական արդարադատության վիճակագրության սկզբունքները խոսում են այն մասին, որ դրանք պետք է վերլուծվեն առնվազն 10 տարվա կտրվածքով»,- ասաց Գասպարյանը։
Վերջինիս խոսքով՝ բանակում սպանությունների, ինքնասպանությունների պատճառներից մեկը հասարակության կրթական մակարդակն է, երբ բանակ են գնում երիտասարդներ, ովքեր ունեն կրթական, ինտելեկտուալ շատ ցածր մակարդակ։ Իսկ հանցագործությունները, ի վերջո, լայնախոհության պակասի հետևանք են։
«Բացի այդ, բանակը, որպես փակ հաստատություն, ունի որոշակի դեգրադացնող գործոն։ Եվ երբ դրան գումարվում է նաև զինվորների որոշակի տոկոսի մոտ առկա պարտադրանքի զգացումը, դրանից էլ ծնվում են նոր հանցագործություններ։ Ես սխալված չեմ լինի, եթե ասեմ, որ բանակում զինվորների որոշ մասը հարկադիր կերպով է գնում բանակ, և դեռևս չկա պատվի, հանուն հայրենիքի զգացումը։ Այս ամենին գումարվում է նաև փակ տարածությունը, միասեռ խմբում գտնվելը կարող են ծառայել որպես կրիմինոգեն գործոններ»,-ասաց Գասպարյանը։
Անդրադառնալով բանակում կատարվող փոփոխություններին, «Ես եմ», «Պատիվ ունեմ» ներդրված նոր ծրագրերին՝ մեր զրուցակիցը նշեց, որ «պետության մեջ ապրելը, պետության համար ծառայելը պետք է պատիվ լինի, ոչ թե հերոսություն, բայց Հայաստանում այսօր ապրողը հերոս է դարձել։ Քանի դեռ Հայաստանում պետական կառավարման համակարգի նկատմամբ, ընտրական համակարգի նկատմամբ, մյուս ինստիտուտների նկատմամբ տոտալ անվստահություն կա, և այս ֆոնին հայտարարել, թե բանակ ենք զարգացնում, բանակում ծառայելը պատիվ է՝ տեղին չէ։ Լուրջ աշխատանք կա անելու»։
Արշակ Գասպարյանի խոսքով՝ որոշակի գումարի դիմաց շահագրգռելով մարդուն տանել բանակ, դա լուծում չէ։ Գումարը՝ 5 միլիոնը, բանակում ծառայելու համար չպետք է մոտիվացիա լինի։ «Հենց 5 միլիոնը դառնա բանակում ծառայելու մոտիվացիա, պատճառ, մենք ունենալու ենք սպանությունների աճ»,- ասաց Գասպարյանը։
Առավել մանրամասն՝ տեսանյութում:
