ԱՄՆ նախագահ Դոնալդ Թրամփը սկսել է ավելի քիչ ժամանակ տրամադրել գործերին, ավելի շատ հեռուստացույց դիտել, հեռախոսազանգեր կատարել և հաղորդագրություններ հրապարակել Twitter-ում։ Այս մասին հայտնում է Axios պորտալը՝ հղում անելով ԱՄՆ նախագահի ժամանակացույցին։
Համաձայն նախագահի ամենօրյա ռեժիմի՝ Թրամփը սկսում է աշխատանքային օրը ժամը 11:00-ին՝ հետախուզական և ազգային անվտանգության հարցերով ճեպազրույցներից։
Սակայն նրա գրաֆիկում 8:00-11:00-ն ծրագրված է Օվալաձև կաբինետում վարչական հարցերի լուծում։ Պարբերականի տվյալներով՝ այդ ընթացքում Թրամփը գտնվում է իր աշխատասենյակում, դիտում հեռուստացույց, զրուցում հեռախոսով և հաղորդագրություններ հրապարակում Twitter-ում։
Օվալաձև կաբինետում Թրամփն աշխատում է մինչև 18:00-ն։ Այդ ընթացքում նա 1-2 հանդիպում է ունենում, որից հետո հեռախոսազանգեր կատարում կամ նորություններ դիտում ճաշարանում, որը գտնվում է կաբինետի կողքին։
Աշխատանքային օրվա ավարտից հետո Թրամփը վերադառնում է Սպիտակ տան բնակելի հատված, որտեղ կրկին հեռուստացույց է դիտում կամ զրուցում հեռախոսով։
Ինչպես նշում է պորտալը, իր նախագահության սկզբում Թրամփը սկսում էր աշխատել վաղ և ավելի ուշ ավարտում։
ԱՄՆ նախագահի մամլո քարտուղար Սառա Սանդերսը հայտարարել է, որ նախագահը մշտապես աշխատում է։
«Նա մշտապես զանգահարում է աշխատակիցներին, կոնգրեսականներին, նախարարներին և արտասահմանյան երկրների առաջնորդներին»,-ասել է Սանդերսը։
Հունվարի 6-ին Դոնալդ Թրամփը, խոսելով անձնական որակների մասին, իրեն հանճար էր անվանել։
