Ռուսաստանի ռազմավարական զարգացման ինստիտուտի գլխավոր տնօրեն Անդրանիկ Նիկողոսյանի կարծիքով՝ Ռուսաստանի դեմ սահմանվելիք պատժամիջոցները մեզ վրա էական ազդեցություն չեն ունենա։ «Առաջին լրատվական»-ի հետ զրույցում Նիկողոսյանն ասաց. «Այդ պատժամիջոցների արդյունքում շատ ներդրումներ կավելանան Հայաստանում։ Եթե այդ պատժամիջոցները լինեն, Հայաստանում ներդրումները կշատանան։ Այդ փողերով Հայաստանում ներդրում կանեն, ոչ թե Եվրոպայում կամ Ամերիկայում»։
Հիշեցնենք, որ ավելի վաղ ԱՄՆ ֆինանսների նախարարությունը պատժամիջոցներ էր սահմանել Ռուսաստանի իշխանություններին մոտ կանգնած 10 քրեական հեղինակությունների, այդ թվում՝ հայազգի Ռուբեն Թաթուլյանի (Ռոբսոնի) նկատմամբ։ Նոր պատժամիջոցների ցուցակ է սպասվում մինչև 2018 թվականի փետրվարի վերջ։
Անդրանիկ Նիկողոսյանը նշում է. «Ռուսաստանը բազմազգ երկիր է, որտեղ ապրում են և՛ հայեր, և՛ ադրբեջանցիներ, և՛ ուզբեկներ՝ տարբեր ազգեր, ոչ միայն ռուսներ։ Նրանք բոլորը Ռուսաստանի քաղաքացիներ են, և ազգայնական պատկանելությունը կապ չունի սանկցիաների կիրառման հետ։ Նրանք այդ պատժամիջոցները կիրառում են Ռուսաստանի քաղաքացիների նկատմամբ, և դրանով ավելի շատ պետք է մտահոգված լինեն Ռուսաստանի իշխանությունները և ոչ Հայաստանի»։
Մեր այն դիտարկմանը, թե պատժամիջոցների արդյունքում այդ մարդիկ կհայտնվեն դժվար ֆինանսական իրավիճակում և հազիվ թե կարողանան ներդրումներ անել Հայաստանում, Անդրանիկ Նիկողոսյանն արձագանքեց. «Ես չեմ կարծում, դրանք խոսակցություններ են, դեռ վաղ է խոսել, թե պատժամիջոցներն ինչ տեսքով կկիրառվեն։ Առայժմ մենք պետք է համբերությամբ զինվենք, Նոր տարուց հետո ամեն ինչ պարզ կլինի»:
