«Հիմնական խնդիրն անձերի մեջ չէ, համակարգի մեջ է: Հայաստանյան համակարգը, ցավոք, գաղութային համակարգ է, և անձերով չի պայմանավորված խնդիրը, այլ արտաքին գաղութային ուժի հետ կապված: Սա չի նշանակում, որ անձը բացարձակապես նշանակություն չունի: Եվ այս առումով Սերժ Սարգսյանի վարչապետ նշանակվելը կամ ինքնանշանակվելը ոչ ոք չի ասում, որ դա բացարձակապես որևէ ազդեցություն և նշանակություն չի ունենա»,-«Առաջին լրատվական»-ի հետ զրույցում ասաց «Հանուն Հայաստան Պետության ճակատի» անդամ Ալեք Ենիգոմշյանը:
Նրա խոսքով՝ եթե Սերժ Սարգսյանը դառնա վարչապետ, ավելի ցցուն կերպով իշխանության լծակները ուղղակիորեն իր ձեռքում պահի, հոգնածությունը, զզվածությունը, ատելությունը համակարգի նկատմամբ ավելի ցցուն կլինի:
«Ապրիլը կարող է լինել պոռթկման մեկնարկ, ինչու ոչ, կարող է մինչև ապրիլ զարգացումներ լինեն թե՛ ներքին, թե՛ արտաքին գործոնների ազդեցությամբ, լինի դա Ռուսաստանում սպասվող ընտրությունները, մինչև ընտրությունները փետրվարին Արևմուտքի կողմից սպասվող պատժամիջոցները Ռուսաստանի նկատմամբ, նաև տարածաշրջանում երևացող կամ դեռևս չերևացող զարգացումները, դա կարող է լինել մինչև ապրիլ, կամ ապրիլից հետո, ամենակարևորն այն է, որ Հայաստանում իսկապես լինի այնպիսի քաղաքական գործընթաց, նախաձեռնություն, ուժ, որը պահում է զարգացումների պուլսը, ճիշտ է գնահատում իրավիճակը, ժողովրդի տրամադրությունները, ունի հստակ ծրագիր և երբ պահը ներկայանա, ժողովրդի մասնակցությամբ այս ամեն ինչին վերջ տալու ցանկալի սկզբը դնի»,-հավելեց Ալեք Ենիգոմշյանը:
Հարցազրույցն ամբողջությամբ՝ տեսանյութում:
