«Առաջին լրատվականի» հետ զրույցում ԱԺ «Ժառանգություն» խմբակցության պատգամավոր, ԵԽԽՎ-ում հայկական պատվիրակության անդամ Զարուհի Փոստանջյանը նշեց, որ, բնականաբար, Սերժ Սարգսյանը ԵԽԽՎ-ում նախատեսվող իր ելույթի ընթացքում կասի, որ բարեփոխումներ են տեղի ունենում Հայաստանի Հանրապետությունում «և այլն, և այլն»:
«Բայց ես չեմ կարծում, որ իր ելույթը կարող է բավարարել պատվիրակներին, և պատվիրակները, բնականաբար, սուր հարցեր կհնչեցնեն»:
Զարուհի Փոստանջյանը տեղեկացրեց, որ ինքը ևս գրանցվել է Սերժ Սարգսյանին հարց ուղղելու համար, սակայն հրաժարվեց ներկայացնել, թե ինչ խնդիրների վերաբերյալ է մասնավորապես հարցեր հնչեցնելու: Հրաժարվեց ներկայացնել նաև մյուս պատվիրակությունների անդամների տրամադրվածությունը, իր ունեցած տեղեկատվությունը վերջիններիս հարցադրումների վերաբերյալ՝ պատճառաբանելով, որ սխալ կլինի այդ հարցերի բովանդակությունը հրապարակել հիմա, դրանք պետք է առաջին անգամ հնչեցվեն հենց ԵԽԽՎ-ում, որպեսզի անակնկալ լինեն Սերժ Սարգսյանի համար:
Հիշեցնենք, որ ԵԽԽՎ ամառային նստաշրջանի արդեն ընդունված օրակարգի համաձայն՝ հունիսի 22-ին ԵԽԽՎ-ում ելույթ պետք է ունենա Սերժ Սարգսյանը, ինչին կհաջորդեն պատվիրակությունների հարցադրումները վերջինիս:
