«Դա օրենքի կոպիտ խախտում է․ մեքենան կլինի աջ ղեկով, թե ձախ՝ կապ չունի, դա կոնկրետ մասնավոր սեփականություն է, որի դիմաց այս կամ այն անձը վճարել է։
Օրինակ Վրաստանում մեկ տարի առաջ այդպիսի օրենք ընդունվեց, որ աջ ղեկով մեքենայի մաքսազերծումն ավելի թանկ է և դրանից հետո Վրաստանում, ովքեր ցանկանում են աջ ղեկով մեքենա են ներկրում, ովքեր չեն ցանկանում՝ ձախ ղեկով են ներկրում, այսինքն մեզ մոտ էլ կարելի է նույնը անել, պարզապես ողջամիտ դրույքաչափ սահմանել ՝ ինչ-որ սիմվոլիկ գումար և առանց խոչընդոտների ներկրել այն մեքենան, որը մարդը ցանկանում է»,- «Առաջին լրատվական»-ի հետ զրույցում ընդգծեց «Աջ ղեկ» նախաձեռնության համակարգող Գևորգ Աճեմյանը։
Վերջինս օբյեկտիվ չի համարում կառավարության այն հիմնավորումները, որ աջ ղեկով մեքենաների շահագործումը երթևեկության համար վտանգավոր է։
«Չկա կոնկրետ վիճակագրություն, թե աջ ղեկանիվով մեքենաների քանի տոկոսն է ճանապարհատրանսպորտային պատահարների պատճառ դարձել և այդ վթարներից քանիսի դեպքում է աջ ղեկանիվով մեքենայի վարորդը մեղավոր եղել, հետևաբար կառավարության նման հիմնավորումները, նման որոշումը ոչ մի փաստարկի չի դիմանում, նրանք շատ թույլ են այս հարցում»։
Գևորգ Աճեմյանի կարծիքով՝ հնարավոր է, որ հետագայում առհասարակ արգելվի աջ ղեկով կառավարմամբ մեքենաների ոչ միայն ներմուծումը Հայաստան, այլ նաև դրանց շահագործումը։
«Եթե հիմա վերջանականապես որոշվի վերահաշվառումն արգելել և եթե կառավարությունը սա «մարսեց», ապա նրանց հաջորդ քայլը լինելու է այդ մեքենաների շահագործումն արգելելը»,-ասաց նա։
Հիշեցնենք, որ 2018-ի ապրիլի 1-ից կառավարությունը մտադիր է արգելել աջ ղեկով ավտոմեքենաների ներմուծումը․ edraft.am կայքում արդեն մի քանի օր է քննարկման է դրվել «Աջակողմյան ղեկային տեղաբաշխմամբ տրանսպորտային միջոցների ներմուծման ժամանակավոր արգելքի մասին» օրենքի նախագիծը, որտեղ նշվում է, որ Հայաստանում աջակողմյան ղեկով տրանսպորտային միջոցների շահագործումը վտանգավոր է: Օրենքի նախագծով առաջարկվում է նաև թույլատրել մինչև 2018 թվականի ապրիլի 1-ը ներկրված տրանսպորտային միջոցների շահագործումը, սակայն սահմանափակել տրանսպորտային միջոցների վերահաշվառումը:
Մանրամասները՝ տեսանյութում։
