Համաշխարհային բանկի առողջապահության ոլորտի մասնագետների հետ հանդիպմանը ՀՀ առողջապահության նախարար Լևոն Ալթունյանը քննարկել է համատեղ իրականացվող ծրագրերի ընթացքը։
Այս մասին տեղեկացրին ՀՀ առողջապահության նախարարության հասարակայնության հետ կապերի բաժնից՝ հավելելով. «Առողջապահության ոլորտի տնտեսագետ, առաջադրանքի թիմի ղեկավար Անա Հոլտը և Լևոն Ալթունյանը կարևորել են դեռևս 2015թ. մեկնարկած զարկերակային գերճնշման, շաքարային դիաբետի և ՊԱՊ թեստի սկրինինգային ծրագրերի շարունակականությունը։
Անդրադառնալով Համաշխարհային բանկի և կառավարության համաֆինանսավորմամբ արդիականացված Արյունաբանական կենտրոնին` Անա Հոլտը նշել է, որ ամենաժամանակակից սարքավորումներով և բարձր որակավորում ունեցող մասնագետներով ապահովված կենտրոնը կարող է հավակնել տարածաշրջանում կարևոր դերակատարում ունենալու։
Նախարար Լևոն Ալթունյանը և ՀՀ ԱՆ աշխատակազմի ֆինանսատնտեսագիտական վարչության պետ Անի Հարությունյանը տեղեկացրել են, որ Արյունաբանական կենտրոնի բժշկական ծառայությունների արտահանման մեծ հնարավորություններն իրականություն դարձնելու նպատակով դեռ անցած տարի նախարարությունը հանձնարարել է մշակել բիզնես պլան, որում պետությունն իր մասնակցությունը ևս ունենալու է։
Նշվել է, որ արդեն ներկայացված երեք տարվա հավակնոտ պլանն իրատեսական է։ Դրանում ոսկրածուծի փոխպատվասումը դիտվում է նաև որպես առանձին բիզնես պլան, ինչը չի կարող խոչընդոտել կենտրոնի գործունեության բնականոն իրականացմանը։
Համաշխարհային բանկի ներկայացուցիչների կողմից նման մոտեցումը ողջունվել է։ Այստեղ ընդգծվել է ակտիվ մարկետինգի և հանրայնացման անհրաժեշտությունը։
Բժշկական տուրիզմը զարգացնելու գործում երկուստեք կարևորվել է սփյուռքի և հատկապես սփյուռքահայ բժիշկների ներուժի ընդգրկումը։
Նախարարի տեղակալ Սամվել Մարգարյանի հետ նախորդ օրն ունեցած աշխատանքային քննարկման ընթացքում Համաշխահային բանկի մասնագետները ծանոթացել են ֆինանսավորման նոր մոտեցումներին, մասնավորապես` Հայաստանում առանձին խմբերի համար պետության կողմից բժշկական ապահովագրական փաթեթներ ձեռք բերելու փորձին։
Այս ծրագրերը ևս արժանացել են Համաշխարհային բանկի գործընկերների հավանությանը։ Ավելին` ՀԲ-ի ներկայացուցիչները նշել են, որ հաջողության դեպքում ներդրված յուրատեսակ մոդելը կարող է դառնալ հաջողված փորձի լավագույն օրինակներից մեկը»։
