Հարցման արդյունքները միանշանակ են: Եթե 3 ամիս առաջ Իսրայելի դեմ զինված պայքարի օգտին է հանդես եկել պաղեստինցիների 35%-ը, ապա Երուսաղեմն Իսրայելի մայրաքաղաք ճանաչելու Թրամփի որոշումից հետո նրանց թիվը հասել է 44%-ի: Այդ որոշումից հետո կտրուկ աճել է պաղեստինցիների թիվը, ովքեր կողմ են սեփական պետության ստեղծման հարցի ռազմական լուծմանը: Այսպիսին են Քաղաքական և սոցիոլոգիական հետազոտությունների պաղեստինյան կենտրոնի և Կոնրադ Ադենաուերի գերմանական հիմնադրամի բաժնի՝ Ռամալլահում կատարած հարցման արդյունքները, որոնք հրապարակվել են դեկտեմբերի 12-ին:
Պաղեստինի հարցված բնակիչների 44%-ը կողմ է արտահայտվել Իսրայելի հետ զինված պայքարին: Հարցվածների 27%-ը բանակցությունների հույս ունի, 23%-ը շեշտը դնում է ոչ բռնի դիմադրության վրա:
Հարցվածների 91%-ը Երուսաղեմի վերաբերյալ ԱՄՆ-ի որոշման մեջ սպառնալիք է տեսնում պաղեստինյան շահերի համար: 45%-ը կողմ է արտահայտվել դրան կտրուկ արձագանքին՝ ընդհուպ մինչև երրորդ ինթիֆադա (պաղեստինյան ընդդիմադիր շարժում) սկսելուն և ԱՄՆ-ի հետ դիվանագիտական հարաբերությունները խզելուն:
