Գարի Կասպարովը բարձր տեխնոլոգիաներն ատելու շատ պատճառներ ունի, այդ թվում այն, որ նա դարձել է շախմատի աշխարհի առաջին չեմպիոնը, ում պարտության է մատնել համակարգիչը, ինչպես նաև այն, որ նա մոտ 10 տարի եղել է «անապատում լացող ձայն»՝ նախազգուշացնելով քաոսի և ավերածությունների մասին, որոնք պատճառում են ռուսական «բոտերը», The Times-ում գրում է Նիկոլա Վուլոկը։ Կասպարովը հարցազրույց է տվել Լոնդոնում Google-ի շտաբ-բնակարանում, որտեղ հավաքվել էին շախմատիստները։
Շախմատից հեռանալուց հետո Կասպարովն անցում է կատարել քաղաքական դաշտ, 2007 թվականին ձերբակալվել է և ոչ տևական ժամանակ վարչական կալանքի ենթարկվել Պուտինին դիմակայելու համար։ Բանտում նրան ծեծի են ենթարկել, նա ասում է, որ ոստիկանը, որը դատարանում ցուցմունք է տվել իր դեմ, բացահայտ ստել է։ Նրա խոսքով՝ այն ժամանակ ռեժիմը «բուսակեր» էր՝ այսօրվա հետ համեմատած։ «Իրավախախտումների» համար, որոնց համար այն ժամանակ սահմանել են 5-10 օրվա կալանք, այժմ դատապարտում են 5-10 տարվա ազատազրկման։ Նա իր մասին ասում է, որ ինքը «վտարանդի» է, ով չի կարող վերադառնալ. «Ավելի հստակ ասած՝ ես կարող եմ վերադառնալ Ռուսաստան, սակայն դա կլինի միակողմանի տոմս»։
«Հավանաբար մենք պետք է երախտապարտ լինենք ճակատագրին Թրամփի հաղթանակի համար։ Դա զարթոնքի ազդանշան էր։ Նա պայթեցրել է համակարգը»,-ասել է Կասպարովը։
«Կարևոր է գումար ներդնել «ճշմարտության» գաղափարի վերածննդում։ Դա դժվար է, քանի որ սխալ ասելու շատ միջոցներ կան, սակայն ճշմարտությունն ասելու միայն մեկ միջոց կա։ Մարդիկ չեն ցանկանում հավատալ փաստերին, որոնք չեն համընկնում իրենց քաղաքական տեսակետի հետ, և դա մեծ հաղթանակ է Պուտինի համար։ Կան 25-30 տոկոս մարդիկ, ովքեր չեն հրաժարվի Թրամփից ոչ մի բանի համար, որքան էլ սուտը համոզիչ լինի»,-ասել է Կասպարովը։
Կասպարովի խոսքով՝ դիմակայության համար անհրաժեշտ է «կառավարության, խոշոր բիզնեսի, ՏՏ ընկերությունների, հանրության ու ԶԼՄ-ների համակցված մոտեցումը»։ «Դա իսկական պատերազմ չէ, դա նույնիսկ սառը պատերազմ չէ, դա հիբրիդային պատերազմ է»,-ասել է նա։
