Պաշտպանության նախարարության կողմից ներկայացված տարկետման իրավունքը վերացնող օրենքի նախագծի դեմ պայքարող ուսանողներն այսօր կրկին բողոքի ակցիա են կազմակերպել:
Ուսանողները պնդում են, որ տարկետման իրավունքը վերացնելը ճիշտ չէ, քանի որ բանակից վերադառնալուց հետո քչերն են շարունակում ուսումը կամ հիմնականում կիսատ են թողնում: ՊՆ ղեկավարությունը, իր հերթին, պնդում է, որ տարկետման հնարավորությունը շատերի համար փրկօղակ է դառնում զինվորական ծառայությունից խուսափելու համար:
Երկու տեսակետներն էլ սկզբունքորեն ճիշտ են, այլ խնդիր է, որ իշխանությունների փաստարկը, մեղմ ասած, մոտիվացված չէ, որովհետև եթե կրթական համակարգում կոռուպցիոն դրսևորումներ չլինեն ու բուհերում հայտնվեն միայն կրթվելու ցանկություն ունեցողները, ապա կվերանա այն փաստարկը, որ իր նախաձեռնության հիմքում դնում է ՊՆ-ն:
Ուսանողական տարկետումների խնդիրը նոր չի առաջացել. բանակի ձևավորվան առաջին օրերից այն եղել է քննարկումների, անգամ` բանավեճերի թեմա: Բանակի դիրքորոշումը գրեթե միշտ նույնն է եղել, պարզապես 90-ականների կեսերին Հայաստանի իշխանության վերնախավում մեծ թիվ էին կազմում կրթության համակարգի հետ կապված գործիչները, ովքեր գիտության զարգացման հրամայականը բերելով առաջին պլան` հակադրվում էին ՊՆ նախաձեռնություններին: 1996-97թթ-ին ուսանողական տարկետման թեման անգամ ներիշխանական լուրջ ճգնաժամի պատճառ դարձավ, որովհետև հրապարակայնորեն բախվեցին այն օրերի ԱԺ նախագահ Բաբկեն Արարքցյանի և ՊՆ նախարար Վազգեն Սարգսյանի դիրքորոշումները:
Հիմա իշխանությունները համոզված են, որ կարողանալու են վերացնել ուսանողական տարկետումը: Զանգվածային ակցիաների ինստիտուտը Հայաստանում ճգնաժամ է ապրում և կանխատեսելի է, որ իշխանությունները չեն ունենալու ուսանողական հուզումների գլխացավանք: Մյուս կողմից` ուսանողական տարկետման հարցում իշխանության ներսում գոյություն ունի լիակատար կոնսենսուս, որովհետև կրթությունը վարչապետ Կարեն Կարապետյանի օպտիմալացման հիմնական «զոհերից» մեկն է: Սրան գումարած` սահմանային լարվածությունը կաշկանդում է ուսանողական տարկետման վերացման դեմ հանդես եկող ուժերի գործունեությունը:
Պաշտպանության նախարար Վիգեն Սարգսյանը, իհարկե, իր նոր նախաձեռնությունը փորձում է ներկայացնել բանակային ռեֆորմների համատեքստում, սակայն բոլորի համար է ակնհայտ, որ ՊՆ-ն ուսանողական տարկետումը վերացնում է, որովհետև մեծ ծավալների հասնող արտագաղթը վտանգել է զորակոչների ապահովումը, հարվածի տակ է դնում բանակի համալրման գործընթացը: Նույնիսկ Արցախյան առաջին պատերազմի տարիներին Հայաստանի իշխանությունները չգնացին տարկետման վերացմանը, որովհետև արտագաղթի հետևանքները դեռ չէին ազդել դեմոգրաֆիական վիճակի վրա: Հիմա դեմոգրաֆիական վիճակն աղետալի է և հարվածում է արդեն պաշտպանությանը, ազգային անվտանգությանը:
Կրթությունն ու գիտությունը դառնում են զանգվածային արտագաղթի հերթական զոհերը` իշխանությունների հանցավոր քաղաքականության ֆոնին:
Լուսանկարը՝ Photolure-ի
