«Առաջին լրատվական»-ի տեղեկություններով՝ Պետական եկամուտների կոմիտեի տարբեր ստորաբաժանումներ այսօր առավոտվանից տոտալ ստուգումներ են անցկացնում Գագիկ Ծառուկյանին պատկանող ընկերություններում։ Պատճառը սպորտի և երիտասարդության հարցերի նախարար Հրաչյա Ռոստոմյանի երեկվա հայտարարությունն էր, որով նախարարը փորձել էր կասկածի տակ դնել մեծ բարերարի ու ազգասերի համարում ունեցող Սամվել Կարապետյանի բարի համբավը։
Ռոստոմյանը խոսելով Ըմբշամարտի ֆեդերացիայի նախագահի պաշտոնից Սամվել Կարապետյանի հրաժարականի և դրանից հետո ստեղծված վիճակի մասին՝ ասել էր. «ՍամվելԿարապետյանը, ով մեծ ներդրում է ունեցել ըմբշամարտի զարգացման մեջ և տևական ժամանակ մեծ աջակցություն է ցույց տվել, մարզաձևին ծանր հարված հասցրեց, և եթե չլիներ Գագիկ Ծառուկյանը, հայկական ըմբշամարտը կրախի առաջ կկանգներ: Փառք Աստծո, այսօր ՀԱՕԿ-ի նախագահի շնորհիվ թե՛ ծանրամարտը և թե՛ ըմբշամարտը որևէ խնդիր չունեն»:
Չնայած Ռոստոմյանը ոչինչ չէր ասել ոչ վարչապետ Կարեն Կարապետյանի և ոչ էլ կառավարության գործունեության մասին, վարչապետ Կարապետյանը այդ հայտարարությունը ընդունել է որպես անձնական վիրավորանք և որոշել է ցույց տալ, թե ինչ կարող է լինել բոլոր նրանց հետ, ովքեր կարող են թեկուզ մի թթու խոսք ասել Կարապետյանի հասցեին կամ կասկածի տակ դնել նրա բարի համբավը։
Եթե վարչապետ Կարեն Կարապետյանին հաջողվի ուժի դիրքերից խոսել Գագիկ Ծառուկյանի հետ և հասնել նրան, որ Հրաչյա Ռոստոմյանը հայտարարի, որ Սամվել Կարապետյանը շարունակում է հանդիսանալ հայկական սպորտի ամենամեծ բարեկամն ու աջակիցը, ապա դա ազդակ կլինի մյուս բոլորի համար, ովքեր շարունակում են տատանվել այն հարցում, թե ում պետք է հավատարմության երդում տալ մինչև 2018թ. ապրիլ։ Իսկ եթե երկուշաբթի օրը սկսվող ԱԺ նստաշրջանի ժամանակ «Ծառուկյան» խմբակցության անդամները պահանջեն Կարեն Կարապետյանի հրաժարականը, ապա կարող ենք գոնե արձանագրել, որ Կարապետյաններին չհաջողվեց կուլ տալ Ծառուկյանին, և ներիշխանական պայքարը թևակոխում է զարգացման նոր փուլ։
