Հոկտեմբերի 9-ին մեծ շուքով նշված Աբովյան քաղաքի տոնին Գագիկ Ծառուկյանի, ՍԴ նախագահ Գագիկ Հարությունյանի և այլ հյուրերի կողքին պատվավոր օթյակում նստած էր նաև նախկին քաղբանտարկյալ, ՀԱԿ վարչության անդամ Գրիգոր Ոսկերչյանը: Նա Աբովյանի առաջին քաղաքապետն է եղել, և, պարզվեց, նրան ներկայիս քաղաքապետ Ծառուկյանի փեսան է հրավիրել մասնակցելու քաղաքի տոնին: Ոսկերչյանից հետաքրքրվեցինք, թե ինչպե՞ս էր նախկին քաղբանտարկյալ, ընդդիմադիր գործիչն իրեն զգում Գագիկ Ծառուկյանի և իշխանության այլ ներկայացուցիչների կողքին և արդյոք դա պայմանավորվա՞ծ է ՀԱԿ-ԲՀԿ մտերմությամբ:
– Քաղաքապետն էր ինձ հրավիրել մասնակցելու այդ միջոցառմանը: Առանձնապես բան չեմ տեսնում այդտեղ: Քաղաքի 50-ամյակն էր, ես էլ առաջին քաղաքապետն եմ եղել: Հրավիրել էին մասնակցելու տոնակատարությանը, ես էլ մի կես ժամ, մի ժամով մասնակցեցի:
– Տոնական մասին և դրան հաջորդած միջոցառմանը չե՞ք մասնակցել Ծառուկյանի հետ:
– Չէ, կարճ ժամանակով եմ մնացել ու դուրս եմ եկել: Բայց մնալ-չմնալու որևէ պրոբլեմ ես չեմ տեսնում: Իմ քաղաքն է դա, ես այդտեղ հաշվառված եմ, այնտեղ եմ մեծացել: Չգնալով ես պետք է բացատրություն տայի` ինքս ինձ, ոչ թե ուրիշ մեկին, թե ինչու չպետք է գնամ իմ քաղաքի 50-ամյակին:
– Պարզապես անմիջապես օթյակում` Ծառուկյանի կողքին նստելն է մեկնաբանությունների տեղիք տվել:
– Ծառուկյանի կողքը ինչ կապ ունի: Այդ օթյակում մի 20-30 մարդ կար: Եվ հետո Ծառուկյանի կողքը լինելու մեջ ես բան չեմ տեսնում: Եթե իրեն էլ են հրավիրել, ինձ էլ են հրավիրել, խնդիր չեմ տեսնում: Ես հրավերը քաղաքապետից եմ ստացել:
– Իսկ Ծառուկյանի հետ ի՞նչ հարաբերություններ ունեք:
– 2008-ի ընտրություններից հետո առաջին անգամ եմ հանդիպել:
– Շփվեցի՞ք այս անգամ:
– Բարևեցինք պարզապես:
– Պարոն Ոսկերչյան, աշխատանքից ազատվել է «7-ի» հայտնի գործով դատախազ Կորյուն Փիլոյանը: Դուք ևս անցնում էիք այդ գործով, ի՞նչ եք կարծում` ինչո՞ւ նրան հեռացրին: Նոր գլխավոր դատախա՞զն էր պատճառը, թե՞ այլ պատճառներ կային:
– Ես չեմ կարծում, որ նրա ազատումն ինչ-որ կերպ կապված է մեր` քաղբանտարկյալներիս գործի հետ: Դա նրանց ներքին հարցերն են, ինչ-որ մեկն ինչ-որ մեկին դուր չի գալիս, ժամանակն է, թոշակավորում են… նրա ազատումը մեզ հետ կապ չունի: Եթե ինչ-որ մեկը նոր գլխավոր դատախազին դուր չէր գալու, փոփոխություն լինելու էր: Եվ դա մեկնաբանել կոռեկտ չեմ համարում:
– Նույն Փիլոյանի ձեռքով բազմաթիվ անձինք քաղբանտարկյալ են դարձել և միայն քաղաքական հայացքների պատճառով հայտնվել անազատության մեջ: Եվ միայն հիմա են ազատում նրան աշխատանքից: Դուք դա նորմա՞լ եք համարում:
– Ես կարծում եմ, որ այս իշխանություններն այնքան լկտի են, որ դա իրենց համար ոչ մի նշանակություն չունի: Այդ գործով բազմաթիվ ուրիշներ են մասնակցել և շատ ուրիշ գործերի: Բազմաթիվ խարդախություններ ու կեղծիքներ են թույլ տվել, բայց շարունակում են աշխատել: Նույնատիպ կեղծիքներ կատարած ուրիշներ ևս կան համակարգում, որ հիմա մնացել են: Այնպես որ, այստեղ զարմանալու և մեկնաբանելու բան չկա:
– Պարոն Ոսկերչյան, մամուլում էլ գրվեց, որ Մարտի 1-ի զոհերի հարազատներն աստիճանաբար հեռանում են Հայաստանից: Հիմնական պատճառն այն է, որ չեն կարողանում հասնել իրենց զավակների սպանության բացահայտմանը, ինչ-որ տեղ հիասթափված են նաև ընդդիմությունից: Այս հարցո՞ւմ էլ են միայն իշխանությունները մեղավոր:
– Կարծում եմ` այդ հարցի պատասխանը վաղուց տրվել է: Քանի դեռ այս իշխանություններն են, ովքեր ֆունկցիոնալ կապ ունեն Մարտի 1-ի դեպքերի հետ, բացահայտում պետք չէ հուսալ: Նրանք, ըստ երևույթին, հուսահատվել են, քանի որ հասկանում են, որ մոտ ժամանակներս իշխանափոխություն չի լինի: Իրենք էլ են հասկանում, որ միայն իշխանափոխությունից հետո հնարավոր կլինի բացահայտել այդ հանցագործներին: Երևի թե մտածում են, որ իշխանափոխությունը ուշանում է, և դրա համար էլ հեռանում են:
– Դուք էլ ե՞ք համոզված, որ մոտ ապագայում իշխանափոխություն չի լինելու: Ընդդիմության մեղքը չե՞ք տեսնում այդ հարցում:
– Ես նման բան չասացի, նրանց փոխարեն ենթադրություն արեցի: Իսկ իմ կարծիքով` իրավիճակն այնպիսին է, որ ամեն ինչ հնարավոր է: Հիմքերը շատ վաղուց հասունացած են, բոլոր տեսակի հիմքերը կան: Գուցե վաղը պատահականորեն ստեղծվեն բոլոր պայմանները, կամ արտաքին հանգամանքները գան օգնության ներքին եղածին, և ստեղծվեն այնպիսի պայմաններ, որ ստացվի մի բան: Ես չեմ բացառում, բայց ներկայիս վիճակով, իհարկե, չի կարելի ասել, որ վաղը կամ մյուս օրը, կամ մեկ ամիս անց դա կլինի:
– Ընդդիմության մեղքը չե՞ք տեսնում այս հարցում:
– Գիտեք, դա հեռախոսային խոսակցություն չէ: Սա շատ լուրջ թեմա է, որին կարելի է անդրադառնալ, բայց ոչ այս ձևով:
