Քաղաքագետների միության նախագահ Հմայակ Հովհաննիսյանն «Առաջին լրատվական»-ի հետ զրույցում կարծիք հայտնեց, որ սկանդալային վերջին զարգացումներից հետո (այն, ինչ տեղի ունեցավ Ստրասբուրգում) բեմադրողի ականջները շատ հստակ երևացին, և դա ոչ այլ ով էր, քան Գագիկ Ծառուկյանի խնամի Հովիկ Աբրահամյանը, հետևաբար ԲՀԿ առաջնորդն էլ պետք է արդարացնող քայլեր աներ. «Ըստ էության, պարզ դարձավ, որ այդ հարցի համար հնարավորություն է ընձեռել հենց Հովիկ Աբրահամյանը՝ Դավիթ Հարությունյանի միջոցով: Բնականաբար, Հովիկ Աբրահամյանն իր կողմից, Ծառուկյանն էլ՝ իր, պետք է քայլեր ձեռնարկեին իրավիճակը մեղմելու համար և Սերժ Սարգսյանի սիրտն առնելու համար, որովհետև Սերժ Սարգսյանն աշխարհով մեկ խայտառակվեց»:
Հովհաննիսյանի պնդմամբ՝ հնարավոր չէ քողարկել այն, որ Հովիկ Աբրահամյանը և Դավիթ Հարությունյանը շատ լավ գիտեին, թե ինչ պետք է խոսի Զարուհի Փոստանջյանը. «Նույնիսկ Հրայր Թամրազյանի հետ հարցազրույցում նրա դեռահաս դուստրն է ասում, որ շատ էլ լավ սպասում էր, որ իր մայրն այդպիսի ելույթ կունենա: Ուրեմն այդ դեռահաս աղջնակն ավելի մեծ քաղաքական հոտառություն ունի, քան Հովիկ Աբրահամյանը և Դավիթ Հարությունյա՞նը»:
Հարցին, թե փաստորեն Գագիկ Ծառուկյանը Հովիկ Աբրահամյանի «մեղքե՞րն է քավում», մեր զրուցակիցը պատասխանեց․«Ոչ, պազապես բնազդ է: Հովիկ Աբրահամյանն է փորձում Փոստանջյանին հեռացնել հանձնաժողովից՝ առաջնորդվելով այն սկզբունքով, որ Մավրն իր գործն արել է,Մավրը պետք է հեռանա: Մյուս կողմից՝ Ծառուկյանը իշխանության կողմից հնարավոր բացասական հետևանքներից խուսափելու համար փորձում է այդպիսի քայլեր անել, իսկ նրանք խնամիներով միասին են հանդես գալիս, ուրեմն Ստրասբուրգում տեղի ունեցածը կարող է անդրադառնալ նաև Ծառուկյանի վրա: Դրա համար նա զգուշավոր քայլեր է անում»:
Հետաքրքրվեցինք նաև, թե հնարավոր համարո՞ւմ է կոալիցիայի ձևավորումը, ինչին ի պատասխան՝ մեր զրուցակիցն ասաց. «Ոչ, կոալիցիայի հավանականություն չեմ տեսնում, եթե հաշվի առնել այն հրապարակային քննադատությունը, որը վերջին ամիսներին սաստկացել է Հանրապետականի հասցեին ԲՀԿ-ի կողմից: Հանրապետականները (Հովիկ Աբրահամյանին հարող հանրապետականները), գիտակցելով, որ հնարավոր չի թաքցնել կամ ժխտել այն փաստը, որ նրանք չէին կարող չիմանալ, թե Զարուհի Փոստանջյանն ինչ հարց է տալու, ասում են, որ գիտակցաբար են դա արել, որովհետև գիտեին, որ ինչ-որ եվրոպական պատգամավորներ՝ ԵԽԽՎ-ից, նախապատրաստվում էին նմանատիպ հարց տալ Սերժ Սարգսյանին: Դա անհեթեթություն է:
Ոչ մի եվրոպական պատգամավոր իրեն թույլ չէր տա նմանատիպ հարց տալ ոչ միայն այլ երկրի ղեկավարին, այլ նաև իր, որովհետև դա դուրս է բոլոր տեսակի էթիկական նորմերից. յուրաքանչյուր պատգամավոր նաև դիվանագետ է:
Ես պարզապես զարմանում եմ, թե Սերժ Սարգսյանն ինչպես մինչև հիմա չի խելագարվել»:
