«Սա ամոթալի երևույթ է, որ արժեզրկում է մեր պետությունը, բայց դրանից բացի, կա նշելու ևս մեկ հանգամանք, որ կապված է մեր ազգային անվտանգության հետ: Հայտնի է, որ աշխարհի բոլոր պետությունները միասին իրենց զինական ներուժով 10 անգամ ավելի թույլ են, քան ՆԱՏՕ-ն: Սա ցանկացած ողջախոհ մարդու պետք է մտածելու տեղիք տար»,- ասաց ԱԻՄ առաջնորդ Պարույր Հայրիկյանը՝ անդրադառնալով Վրաստանում ՆԱՏՕ-ի բազմազգ զորավարժություններին Հայաստանի՝ մասնակցությունից հրաժարվելուն:
Պարույր Հայրիկյանը հակված է հավատալ վրացական պաշտոնական դիրքորոշմանը, որ Հայաստանի հետ համաձայնեցված է եղել մասնակցությունը:
«Մեր մի քանի «քաղաքական» գործիչների հայտարարություններն առ այն, որ մենք անկախ պետություն ենք, ինչ կա, որ վերջին պահին էլ կարող ենք հրաժարվել, սա լակոտություն է, քանի որ ռազմական կառույցի հետ պայմանավորվածությունը վերջին պահին փոխել դու չես կարող»,- ասաց ԱԻՄ առաջնորդը:
Նա նաև նշեց, որ ցանկացած գրագետ մարդ գիտի, որ Ռուսաստանը խուժանապետություն է. «Քաղաքակիրթ աշխարն այսօր Ռուսաստանի հետ ստիպված է խոսել պատժամիջոցների լեզվով, և այդ պետության հետ սերտ կապերը ոչ միայն ամոթալի են, այլ նաև վտանգավոր մեզ համար»,- հավելեց նա:
Հարցազրույցն ամբողջությամբ՝ տեսանյութում:
