Ադրբեջանական APA լրատվական գործակալության փոխանցմամբ, ընտանեկան խնդիրների, կանանց և երեխաների հարցերով պետական կոմիտեն դիմել է Միլլի մեջլիս (խորհրդարան)՝ առաջարկելով ամուսնական տարիքը 17-ից բարձրացնել 18-ի։
Կոմիտեի հաղորդմամբ՝ ընտանեկան դրության մեջ ամենամեծ խնդիր հարուցող հարցերից մեկը վաղ տարիքում ամուսնությունն է։ Բացի այդ, Ադրբեջանն անդամակցել է երեխաների իրավունքների կոնվենցիային, որում, որպես չափահաս դառնալու ժամկետ, նշված է 18 տարեկանը։
Նշվում է, որ Ադրբեջանում վաղ տարիքում տարեկան ամուսնանում է 3000 աղջիկ, ինչի արդյունքում երեխաների մեծ մասը ծնվում է հիվանդություններով։ Մյուս կողմից էլ այդպիսի ընտանիքներում մեծ թիվ են կազմում ամուսնալուծությունները։
Հիշեցնենք, որ ապրիլի սկզբին էլ նույն աղբյուրը հայտնեց, թե Ադրբեջանի վիճակագրական պետական կոմիտեի հրապարակած տվյալներով՝ վաղ տարիքում ամուսնացած կանանց 39 տոկոսը բնակվում է քաղաքներում, իսկ 61 տոկոսը՝ գյուղերում:
Մինչև 18 տարին բոլորելն ամուսնացած կանանց 37 տոկոսն այդ քայլին գնացել է սեփական ցանկությամբ, 26 տոկոսը՝ ծնողների ճնշմամբ, 11 տոկոսը՝ ընտանեկան ծանր նյութական դրության պատճառով, 8 տոկոսը՝ հաշվարկային նպատակներով, 6 տոկոսը՝ «առևանգման» արդյունքում, 2 տոկոսը՝ հղիության պատճառով, իսկ մնացած 10 տոկոսը՝ այլ պատճառներով:
Վաղ տարիքում ամուսնացած կանանց ամուսինների 3 տոկոսի տարիքը տատանվել է 18-19-ի միջև, 69 տոկոսինը՝ 20-24-ի միջև, 26 տոկոսինը՝ 25-29-ի միջև, 2 տոկոսինը՝ 30-ից բարձր:
