Այսօր լրատվամիջոցներում տարածվել է հերթական նյութը, որում ներկայացված է 25 հայտնի մարդու անուն, ովքեր, ըստ սկզբնաղբյուրի տեղեկությունների, հարում են այս կամ այն աղանդին:
Ցանկում ներկայացված էր նաև դերասան Սոս Ջանիբեկյանը, ում անունը մինչ օրս չէր կապվել աղանդավորական որևէ կազմակերպության հետ: Դերասանն այս պատճառով շատ էր զայրացել:
ESem.am-ը զրուցել է Սոսի հետ, ով սկզբնաղբյուրից պահանջում է հրապարակայնորեն փաստեր ներկայացնել, որոնք կապացուցեն իր աղանդավոր լինելը: «Ես պահանջում եմ, որպեսզի նյութի հեղինակը հրապարակային ներկայացնի ապացույցներ, ըստ որոնց գրել է, թե ես ինչ-որ աղանդի մասնակից եմ: Ասում եմ հրապարակային, որպեսզի մարդիկ էլ իմանան` ինչի հիման վրա գրված նյութ են կարդացել: Այդպիսիք չկան, որովհետև ես որևէ կապ չունեմ որևէ աղանդի հետ: Առաջին անգամ եմ լսում այն աղանդի մասին, որում, ըստ հեղինակի, ներգրավված եմ: Ես մկրտվել եմ Հայ Առաքելական եկեղեցում` Սոս Սարգսյանի քավորությամբ,- ասաց Սոսն ու հավելեց,- ես այդ նյութից շատ զայրացա, սակայն եթե հանրային մարդ չլինեի, կարհամարհեի, քանի որ տեղյակ եմ, թե կայքերն ինչպես են աշխատում` ավել դիտում ունենալու համար: Կոչ եմ անում չանել այդպիսի բաներ, չխաղալ մարդկանց անվան հետ: Ես ցանկացա հերքում տալ միայն այն պատճառով, որ արդեն բազմաթիվ նամակներ եմ ստացել. ինձ հետևող մարդիկ թյուրիմացության մեջ են ընկել: Ցավում եմ, որ անհաջողակ մարդու կամ մարդկանց մի խմբի պատճառով երկրպագուներս շփոթության մեջ են: Կարծում եմ` այս նյութի հեղինակը կամ հեղինակները կարող էին լինել կա՛մ հային, կա՛մ ինձ ատող մարդիկ: Այսինքն` կա՛մ թուրք, կա՛մ մարդ, ով իմ հանդեպ չարացած է»:
