«Հայաստանի ընտրությունն ինձ համար պատահական չէր, և պետք է ասեմ, որ պահպանելով իմ ջերմ և շատ վաղուց ստեղծված կապերը Հայաստանի ղեկավարության հետ, գիտեի, որ այսպիսի որոշումը կանխատեսելի էր ու պատահական չէր: Այդպիսի ցանկություն Հայաստանի կողմից միշտ կար. Հայաստանը աշխարհաքաղաքական այնպիսի տարածքում է, որ չի կարելի բաժանել տնտեսական և անվտանգության հարցերը»,- այս մասին այսօր Խ.Աբովյանի անվան հայկական պետական մանկավարժական համալսարանի գիտխորհրդի դահլիճում տեղի ուենցած հանդիպման ընթացքում ասաց քաղաքագետ, Ժողովրդավարության և համագործակցության ինստիտուտի նյույորքյան ներկայացուցչության ղեկավար Անդրանիկ Միհրանյանը՝ անդրադառնալով ՍԵրժ Սարգսյանի՝ մոսկովյան հայտնի հայտարարությանը: «Լինելով անվտանգության՝ ռազմավարական իմաստով մի համակարգի մեջ, դու չեք կարող տնտեսության իմաստով մեկ այլ համակարգի մեջ լինել: Այդ իմաստով ես Հայաստանի ղեկավարության որոշումն իմաստուն եմ համարում: Բոլորս գիտենք՝ քարտեզի որ դիրքում է Հայաստանը, և, ցավոք սրտի, նախանձելի հարևաններ չունենք, այնպես որ մենք առաջին հերթին պետք է ելնենք գոյապահպանության, մեր անվտանգության շահերից և պետք է հասկանանք՝ ովքեր են մեր բարեկամները, որոնք ամենածանր պահին կկանգնեն մեր կողքին»,-ասաց նա:
Նրա խոսքով՝ Հայաստանը և՛ էներգետիկայի, և՛ տնտեսական մյուս ուղղություններով շատ մեծ կախվածություն ունի մեր ռազմավարական գործընկեր Ռուսաստանից․«Մաքսային միությանն անդամագրվելու ոոշումը եղել է մտածված և ունի իր պատմությունը: Չգիտեմ՝ այն ձեզ ներկայացվել է թե ոչ, համենայն դեպս, ես գիտեմ իմ հանդիպումներից, որ հայկական կողմը միշտ հետաքրքրություն է ունեցել Մաքսային միությանն անդամագրվելու վերաբերյալ, ուղղակի կային խոչընդոտներ, և այսօր այդ խոչընդոտները մի կողմ են դրվել: Հայաստանը ոչ միայն միացավ Մաքսային միությանը, այլև այս որոշումից հետո Հայաստանն արդեն այլ ձևով կխոսի Եվրոպացիների հետ: Եթե նրանք առաջ ասում էին՝ կա՛մ մեզ հետ պետք է լինեք, կա՛մ նրանց՝ բոլշևիկյան մոտեցմամբ, հիմա Եվրամիությունն ասում է՝ մենք կշարունակենք Հայաստանի հետ սերտ համագործակցությունը»:
«Առաջին լրատվական»-ի այն հարցին, թե այդ ինչպե՞ս էր այս որոշումը սպասված, երբ երկրի վարչապետը հայտարարում էր, թե մենք Մաքսային միությանը չենք կարող անդամագրվել ընդհանուր սահմանի բացակայության պատճառով, փոխարտգործնախարարն ասում էր՝ մենք սուվերեն երկիր չենք լինի այդ կերպ, իսկ ԱԺ ՀՀԿ խմբակցության ղեկավարն էլ Սերժ Սարգսյանի հայտարարությունից մի քանի ժամ առաջ ասում էր, թե Հայաստանը կնախաստորագրի ԵՄ-ի հետ Ասոցացման համաձայնագիրը, ի վերջո, երեքուկես տարի շարունակ այդ համաձայնագրի համար Հայաստանը Եվրամիության հետ բանակցություններ էր վարում, Անդրանիկ Միհրանյանը պատասխանեց․ «Հայկական ռեալ ղեկավարությունը,- իսկ ես գիտեմ հայկական ռեալ ղեկավարությանը՝ սկսած Լևոն Տեր-Պետրոսյանից,- միշտ ունեցել է խոր համոզմունք, որ եթե Հայաստանին «կամ-կամ»-ի պայմաններ առաջադրվեն, որոշումը միշտ կլինի Ռուսաստանի հարաբերությունների զարգացումը. սա Հայաստանում այլընտրանք չունի»:
Ա․Միհրանյանի գնահատմամբ՝ սա չի նշանակում, որ ամեն ինչ սահմանափակվում է, ուղղակի սա, ըստ Միհրանյանի, եվրոպացիների կողմից շատ գռեհիկ ճնշում գործադրելու փորձ էր․ «Ես ինքս եմ կարդացել Լեհաստանում Սերժ Սարգսյանի ելույթը, երբ ասում էր՝ մեզ այսպիսի իրավիճակի մեջ ինչո՞ւ եք դնում, մենք կարող ենք և՛ այստեղ լինել, և՛ այնտեղ: Չգիտեմ ինչ են ասել փոխնախարարն ու վարչապետը, ես գիտեմ, որ արտաքին հարցերով երկրում զբաղվում է նախագահը, ես նախագահի կարծիքը շատ վաղուց եմ իմացել, ես գիտեմ, որ նա շատ հետևողական մարդ է և շատ լավ է հասկանում երկրի արտաքին շահերը»:
Մանրամասները դիտեք տեսանյութում:
