Երևանի զարգացմանն ուղղված ծրագրային հստակ քաղաքականության արդյունքում, մայրաքաղաքում աստիճանաբար լուծում են ստանում երևանցիների համար տասնամյակներ շարունակ անլուծելի թվացող բազում խնդիրներ: Բնակիչների կողմից առավել քան սպասված էր նաև մայրաքաղաքի բազմաբնակարան շենքերի տանիքների վերանորոգման ու մուտքերի բարեկարգման ծրագիրը:
Երևանի քաղաքապետարանի տեղեկատվության և հասարակայնության հետ կապերի վարչությունից «Առաջին լրատվական»-ին հայտնում են, որ խնդրին համալիր լուծում տալու նպատակով, քաղաքապետ Տարոն Մարգարյանի հանձնարարությամբ գույքագրվեցին վերանորոգման առաջնային անհրաժեշտություն ունեցող տանիքները և հաստատված ծրագրի համաձայն մեկնարկեցին վերանորոգման աշխատանքները: 2012թ-ից մեկնարկած աշխատանքները լայն թափով շարունակվեցին նաև այս տարի:
2013թ-ի ծրագրի շրջանակում բարեկարգվել և իզոգամով է պատվել 68387 քմ հարթ տանիք: Ծրագրի համաձայն փոխվել են նաև թեք տանիքների ազբոշիֆերները և թիթեղները: Տարեկան ծրագրով վերանորոգվել է 48550 քմ թեք տանիք:
Ծավալային առումով բավականին շոշափելի աշխատանքներ են կատարվել նաև քաղաքապետարան-վարչական շրջան-համատիրություն համատեղ ծրագրով իրականացվող մուտքերի վերանորոգման ուղղությամբ:
Ըստ այդմ, այս տարի բարեկարգվել է շուրջ 1190 մուտք: Տարեկան ծրագրով նախատեսված աշխատանքներից զատ վարչական շրջաններում գործընթացը դեռևս շարունակվում է նաև լրացուցիչ ծրագրերով:
Մայրաքաղաքի բազմաբնակարան շենքերի տանիքների վերանորոգման ու մուտքերի բարեկարգման ծրագրերը առաջիկա տարիներին ևս լինելու են շարունակական:
