Ամերիկյան Bloolmberg գործակալությանը տված հարցազրույցում Ռուսաստանի արտաքին գործերի նախարար Սերգեյ Լավրովը հայտարարել է, որ Ռուսաստանը չի մասնակցում ներլիբիական կարգավորման, Քադաֆիի հրաժարականի հարցով և Լիբիայի առաջնորդին անվտանգության երաշխիքներ տրամադրելու բանակցություններին:
«Մենք չենք մասնակցում անձեռնմխելիության, երաշխիքների վերաբերյալ բանակցություններին: Դա մեր ջանքերի մաս չի կազմում»,- ասել է Լավրովը: «Ես կարող եմ ձեզ հայտնել, չբացահայտելով հանդերձ շատ գաղտնիքներ, որ այն երկրների առաջնորդները, որոնք կարող են ակտիվ ազդել իրադարձությունների զարգացման վրա, քննարկում են իրավիճակի կարգավորման բոլոր հնարավորությունները»,- ասել է Լավրովը:
Նա հավելել է, որ Ռուսաստանի մասնակցությունը բանակցային գործընթացին ԱՄՆ-ի և Ֆրանսիայի նախագահների նախաձեռնությունն էր, որոնք «Մեծ ութնյակի» գագաթնաժողովի ժամանակ խնդրել են ՌԴ նախագահ Դմիտրի Մեդվեդևին որպես միջնորդ հանդես գալ լիբիական հարցում: