«Ժառանգություն» կուսակցության առաջնորդ Րաֆֆի Հովհաննիսյանի՝ «թավշյա հեղափոխություն» իրականացնելու կոչը հասարակական-քաղաքական դաշտում լայն արձագանք չի ստանում։ Խորհրդարանական ընդդիմության հետ «Ժառանգության» և Րաֆֆի Հովհաննիսյանի համագործակցությունը արդեն իսկ կարելի է բացառել։ Արմեն Մարտիրոսյանի և «Ելքի» փոխադարձ մեղադրանքները միասին հեղափոխություն իրականացնելու հույսեր չեն ներշնչում, դե իսկ «Ծառուկյան» դաշինքին 2015 թվականի հայտնի իրադարձություններից հետո դժվար է պատկերացնել հեղափոխականի դերում։
Արտախորհրդարանական ուժերը ևս միանշանակ կարծիք չունեն։ Եղան և՛ դրական, և՛ բացասական կարծիք արտահայտողներ։ «Քրիստոնեա-ժողովրդական վերածնունդ» կուսակցության նախագահ Սոս Գիմիշյանը «Առաջին լրատվական»-ի հետ զրույցում ասաց՝ միավորմանը կողմ է, հեղափոխությանը՝ ոչ:
«Այսինքն՝ ի՞նչ է հասկանում թավշյա հեղափոխություն անել ասելով։ Սահմանադրությամբ հեղափոխություն նախատեսված չէ։ Սահմանադրությունը հստակ ֆիքսել է իշխանափոխության կարգը՝ ընտրություններ կամ Սահմանադրական դատարանի որոշմամբ՝ նախագահի պաշտոնանկություն։ Պաշտոնանկությունն իմաստ չունի՝ 9 ամիս հետո լիազորությունների ժամկետն ավարտվում է։ Պետք է համբերություն ունենանք՝ իզուր տեղը ցնցումների չգնանք»,- ասաց Գիմիշյանը։
Մեր զրուցակիցը հեղափոխություններին դեմ է, որքան էլ, իր խոսքով, դեմ է այսօրվա իշխանություններին. «Մի գող-ավազակ իշխանությանը փոխենք մյուսո՞վ։ Եթե ժողովուրդը համախմբված կանգնի՝ կստացվի, բայց դրա հավանականությունը քիչ է։ Մենք միավորում առաջարկում էինք դեռ խորհրդարանական ընտրություններից առաջ, բայց, ցավոք սրտի, քչերը ցանկացան»,- ասաց նա՝ միևնույն ժամանակ ընդգծելով, որ իր հույսն այն է, որ 9 ամիս հետո նախագահը կհեռանա։
Դիտարկմանը, թե ինչո՞ւ է այդպես կարծում, Սոս Գիմիշյանն արձագանքեց. «Ես այդպես չեմ կարծում, պարզապես կցանկանայի, որ գնար, որովհետև 10 տարում իշխանությունը տապալեց, երկիրը խայտառակ վիճակում է, արտագաղթը մեծացել է, Ղարաբաղի հարցում անհասկանալի դիրքորոշում՝ անհասկանալի պատրաստակամություն տարածքների վերադարձման հետ կապված։ Չկա մի ոլորտ, որտեղ կարող ենք դրական բան արձանագրել՝ կեղծված ընտրություններ, կեղծված սահմանադրական հանրաքվե։
Զարմանում եմ Րաֆֆի Հովհաննիսյանի վրա, թավշյա հեղափոխություն է անում այն դեպքում, երբ այս Սահմանադրությունը փնթի փաստաթուղթ է՝ դրսից պարտադրված։ Ես ցնցումներին դեմ եմ, ժողովուրդը ոտքի չի կանգնի։ Ու պետք չէ ժողովրդին մեղադրել՝ փայլուն ժողովուրդ է, միշտ էլ ազգովի ոտքի է կանգնել, երբ պետք է եղել։ Այսպիսի ժողովուրդ աշխարհում չկա, պարզապես ապաշնորհ քաղաքական գործիչները չկարողացան ժողովրդին առաջ տանել։
Համախմբմանը պատրաստ եմ, բայց կարևոր է հասկանալ, թե ինչ նպատակով։ Եթե բացատրեն՝ ինչպես են թավշյա հեղափոխությամբ ավելի լավ Սահմանադրություն ունենալու՝ շատ լավ, բայց այսօր չեմ տեսնում նման հնարավորություն»։
