Պոլսո Հայոց պատրիարքական փոխանորդ Արամ արքեպիսկոպոս Աթեշյանը թեև նախորդ ամիս վերջապես հրաժարական տվեց՝ կոչ անելով համախմբվել և պատրաստվել պատրիարքի ընտրություններին, սակայն մինչև այս պահը հրաժարականի դիմումը գրավոր չի ներկայացրել և չի դատարկել նաև իր գրասենյակը:
Հիշեցնենք, որ իր հրաժարականի դիմումում Արամ սրբազանը նշել էր. «Մեր կոչն է համախմբուիլ Տեղապահ Սրբազան Հօր շուրջ եւ ջանք ու եռանդ չխնայել՝ ժամ առաջ մեր Աթոռի նոր գահակալը ողջունելու ճանապարհին։ Իրեն այժմէն կը մաղթենք բարի գալուստ, յաջողութիւն, ուժ եւ կարողութիւն՝ ի պայծառութիւն եւ յանսասանութիւն մեր դարաւոր Պատրիարքական Աթոռին»:
Հիշեցնենք, որ Պոլսո Հայոց պատրիարքական փոխանորդ Արամ արքեպիսկոպոս Աթեշյանը հրաժարական է տվել «Հովակիմ 1461» հիմնադրամի նախագահի պաշտոնից, սակայն չի պատրաստվում հրաժարական տալ փոխանորդի պաշտոնից։ Մարտի 15-ին տեղապահի ընտրությունից հետո Արամ սրբազանը, տեսնելով, որ տեղապահ ընտրվել է Գարեգին Բեքչյանը, ներկայացնում է Ստամբուլի փոխնահանգապետի գրությունը, ըստ որի՝ տեղապահի ընտրություններն անօրինական են։ Թեև Գարեգին Բեքչյանն է ստանձնել տեղապահի պարտավորությունները և պատրիարքի ընտրությունները կազմակերպելու գործընթացը:
Ստամբուլի «Ակոս» շաբաթաթերթի հայկական բաժնի խմբագիր Բագրատ Էստուկյանը «Առաջին լրատվական»-ի հետ զրույցում նշեց, որ չորեքշաբթի առավոտյան ժողով է տեղի ունեցել, որտեղ ներկայացվել է աշխատանքային ծրագիր: Նրա խոսքով՝ մինչև այս պահը Արամ սրբազանը չի հրաժարվել իր՝ փոխանորդի կոչումից: «Մինչև այս պահը նա չի հրաժարվել փոխանորդի իր կոչումից, ավելին՝ ներկա չէր այդ ժողովին, տեղապահն էր Գարեգին Բեքչյանը, իսկ ժողովի ատենապետը՝ Սահակ եպիսկոպոս Մաշալյանը: Հիմա պետք է պահանջենք, որ նա այլևս հրաժարվի իր կոչումից»,- ասաց Բագրատ Էստուկյանը: Ավելին՝ Արամ Աթեշյանը չի փոխանցում նաև պատրիարքական կալվածքը:
«Այդ փոխանցումը պետք է ժամ առաջ նա արդեն արած լիներ, բայց դեռ չի արել: Պատճառն այն է, որ հավանաբար Արամը չլուծած հաշիվներ ունի և հիմա պետք է այնպես դասավորի, որ ըստ այդմ հանձնի: Ինքն էլ գիտի, որ այսպես չի կարող շարունակել: Պետք է դասավորի»,- ասաց նա՝ հավելելով, որ որևէ տեղեկատվություն այս առումով իրեն հայտնի չէ, քանի որ եկեղեցին շատ խստապահ է, խիստ գաղտնի է պահում բոլոր այդ անցուդարձերը:
Նա նշեց, որ համայնքը սպասողական վիճակում է, կա մի փոքր անհամբերություն, որովհետև հիմա պատրիարքարանը տեղապահի գլխավորությամբ լռություն է պահպանում և որևէ հստակ բացատրություն հանրությանը չի փոխանցում:
Հետաքրքրվեցինք՝ արդյոք Արամ Աթեշյանի կապը Թուրքիայի իշխանության հետ շարունակվո՞ւմ է սերտ մնալ, Բագրատ Էստուկյանը նշեց. «Արամ Աթեշյանի փոխանորդության օրոք եկեղեցու մեջ նույնիսկ ոստիկաններ կային՝ իբրև Արամ Աթեշյանի թիկնապահ, նրանք պետական ոստիկաններ էին, պետության մարդիկ, ոնց որ ձեր տան մեջ ոստիկան լինի, երբ տան անդամներն էին ամուսինդ, երեխաներդ, ու մեկ էլ ոստիկան, որ քեզ պետք է պաշտպանի տանը՝ ումի՞ց: Եվ այս անբարո երևույթը տարիներ շարունակ եղել է պատրիարքարանում»:
Հատկապես հասարակության մեջ, Բագրատ Էստուկյանի խոսքով, Արամ Աթեշյանը մեկուսացած է, երես չունի մարդամեջ դուրս գալու:
Հիշեցնենք, որ Պոլսո պատրիարքի առաջիկա ընտրություններին Արամ սրբազանը նույնպես որպես թեկնածու կմասնակցի: Բագրատ Էստուկյանը կարծում է, որ նա չունի հնարավորություն առաջիկա ընտրություններին պատրիարք ընտրվելու:
