Դալմայի այգու հողօգտագործողներն այսօր հավաքվել էին կառավարության մոտ՝ ներկայացնելով երեք պահանջ. կա՛մ հօղօգտագործման ժամկետը երկարացնելու, կա՛մ փոխհատուցում տալու, կամ էլ այդ հողերն իրենց վաճառելու:
«Ոչ մեկից որևէ դրական պատասխան չենք կարողանում ստանալ»,- բողոքեց Դալայի այգիներում հողօգտագործող Սարգիս Գրիգորյանը:
«Դալմա-Սոնա» հիմնադրամի նախագահ Ռուզաննա Ղազարյանն էլ «Առաջին լրատվական»-ի հետ զրույցում նշեց, որ մոտ մեկ ամիս առաջ դիմել են կառավարությանը: Եվ ոչ միայն կառավարությանը, այլև ՀՀ նախագահին, վարչապետին, ՍԴ նախագահին, Մարդու իրավունքների պաշտպանին, Երևանի քաղաքապետին:
«Հարցը դրել ենք այսպես. Դալմայի այգիները 2004-ից դրվեցին անօրինական կառուցապատման տակ, և այդ որոշումը ՄԱԿ-ի հանձնաժողովներից մեկը դիմումի հիման վրա ճանաչեց անօրինական, 2004, 2006, 2008, 2009 թվականներին հատուկ որոշումներ ուղարկեց ՀՀ կառավարությանը՝ նշելով, որ իրենք այդ որոշումը համարում են անօրինական, քանի որ խախտվել են հանրության շահերը, հաշվի առնվել չի առնվել նրանց կարծիքը: Այդ որոշումներից հետո որևէ բան չի արվել, մենք էլ դիմել ենք իմանալու՝ ինչ է արվել այդ որոշումների իրականացման ուղղությամբ»,- ասաց Ռուզաննա Ղազարյանը՝ հավելելով, որ ՀՀ նախագահն ընդհանրապես չի պատասխանել, ՍԴ-ն մեկ տողով պատասխանել է, որ ՍԴ-ի իրավասությունների մեջ չի մտնում, իսկ արդարդատության նախարարը, Ռուզաննա Ղազարյանի խոսքով, վեց էջից ավել հեքիաթ է պատմել այն մասին, որ մեր երկրում դատարանը արդար, անաչառ և անկաշառ դատարան է, և կարող են հանգիստ դիմել դատարան:
Նա նշեց, որ 2003-ի մարտից սկսած անընդմեջ ակցիաներ և խաղաղ ցույցեր են անում, ավելին՝ երկրի իշխանությունը իրենց աշխատավարձ պետք է վճարի, քանի որ երկրի երեսը պարզ են անում միջազգային հանրության առաջ. «Ցույց ենք տալիս, որ մեր երկրում Սահմանադրությունը գործում է, հատկապես Սահմանադրության այն դրույթը, որ մեր երկրում գործում է խաղաղ ցույցի իրավունքը»,- հավելեց Ռ. Ղազարյանը:
