Թուրքական Cumhuriyet թերթի փոխանցմամբ, իրանական իշխանությունները փոշմանել են և Հնդկաստան մեկնող Գերմանիայի կանցլերին արգելել են մուտք գործել իրանական օդային տարածք։ Երբ Մերկելի ինքնաթիռը մոտեցել է Իրանի օդային տարածքին, իրանական իշխանությունները հայտարարել են, որ ետ են վերցնում իրենց օդային սահման մուտք գործելու թույլտվությունը։ Արդյունքում Մերկելի ինքնաթիռը երկու ժամ պտույտներ է գործել Թուրքիայի տարածքում։
Նշվում է, որ, Մերկելից բացի, ինքնաթիռում են գտնվել կառավարության անդամներ, գործարար շրջանակների ներկայացուցիչներ։
Ուշագրավն այն է, որ Մերկելի ինքնաթիռից առաջ Նյու Դելի է մեկնել գերմանական պատվիրակության երկրորդ ինքնաթիռը, որը, իրանական օդային տարածքն անցնելով, անարգել տեղ է հասել։
Մերկելի ինքնաթիռի համար արգելքի որոշումն իրանական իշխանությունները պատճառաբանել են երկու երկրների միջև «կոորդինացման խնդիրներով»։
Հիշեցնենք, որ մայիսի կեսերին Գերմանիան որոշել էր պատժամիջոցներ կիրառել Համբուրգում գտնվող իրանական Europaeisch-Iranische Handelsbank (EIH)-ի նկատմամբ, որը կասկածվում է միջուկային նյութերին առնչվող ապօրինի գործարքներ կնքելու մեջ։
Չպետք է մոռանալ նաև այն, որ հենց գերմանացի փորձագետներն են ԱՄՆ-ին խորհուրդ տվել Իրանի վրա հարձակվել ոչ թե զինված ուժերով, այլ համակարգչային վիրուսով։ Խոսքը Stuxnet վիրուսի մասին է։
Նախորդ տարվա սեպտեմբերի վերջին իրանական իշխանությունները պաշտոնապես ընդունեցին, որ երկրի միջուկային օբյեկտների (այդ թվում՝ Բուշեհրի ԱԷԿ-ի ու Նաթանզում գտնվող ուրանի հարստացման գործարանի) կառավարման համակարգերի համակարգչային ծրագրերը հարձակման են ենթարկվել Stuxnet անվամբ համակարգչային վիրուսի կողմից: Ավելի ուշ հայտնի դարձավ, որ Stuxnet-ը իրանական միջուկային օբյեկտներում վնասել է մոտ 30,000 համակարգիչներ և այլ սարքավորումներ:
Վիրուսը, հայտնվելով համակարգչի կամ համակարգչային ծրագրով (software) կառավարվող որևէ սարքավորման մեջ, չի գործում («քնած» է մնում) այնքան ժամանակ, քանի դեռ չի հայտնաբերում իրեն անհրաժեշտ համապատասխան կոդը, որն էլ կառավարում է որոշակի արդյունաբերական գործընթաց (օրինակ՝ միջուկային որևէ օբյեկտի աշխատանքի կառավարում), որից հետո Stuxnet-ը, ինքնուրույն ակտիվանալով (կամ ակտիվանալով «դրսից» ստացված հրամանի համաձայն), սկսում է գործել՝ շարքից հանելով համապատասխան համակարգերն ու միաժամանակ «դուրս» հաղորդելով տվյալ օբյեկտի վերաբերյալ անհրաժեշտ տեղեկատվությունը:
Ի դեպ, Stuxnet-ը, տարածվելուց զատ նաև ձևափոխվում է, և հայտնաբերվելուց հետո վիրուսի երեք նոր տարբերակ է սկսում տարածվել:
