Անհայտ անձինք պղծել են Ֆրանսիայի նախկին նախագահ Շարլ դե Գոլի գերեզմանը: Դեպքի մասին հաղորդվում է տեղի քաղաքապետարանի թվիթերյան էջում:
Դեպքը տեղի է ունեցել շաբաթ օրը Վերին Մարնա դեպարտամենտի Կոլոմբե-լե-Դեզ-Էգլիզ վայրում:
France Info պորտալի հաղորդմամբ՝ երկու անհայտ անձ գնացել են գերեզմանոց տեղի ժամանակով մոտ 17.00-ին (մեր ժամանակով՝ 19.00): Նրանցից մեկը բարձրացել է դե Գոլի գերեզմանի վրա և գցել է տապանաքարի վրայի քարե խաչը: Պարբերականի տեղեկացմամբ՝ խաչը փշրվել է:
Դեպքի հետաքննությամբ զբաղվում է տեղի ժանդարմերիան:
Ֆրանսիացի լեգենդար գեներալ և պետական գործիչ Շարլ դե Գոլը (1890-1970թթ.) Երկրորդ աշխարհամարտի ժամանակ դարձել է Դիմադրության շարժման առաջնորդ: 1944թ. նա զբաղեցրել է Ֆրանսիայի նախարարների խորհրդի նախագահի պաշտոնը, իսկ հետո ընտրվել երկրի նախագահ՝ սկիզբ դնելով Հինգերորդ հանրապետության դարաշրջանին:
