168.am-ի տեղեկություններով՝ «Նաիրիտ» գործարան են ժամանել իտալական «Pirelli» ընկերության ներկայացուցիչները՝ ծանոթանալու քիմիական հսկային, գնահատական տալու և համագործակցության հնարավոր ուղղությունները որոշելու համար:
«168 ժամ»-ը գրում է, որ նրանք այստեղ են գործարանի կառավարմամբ հետաքրքրված «Ռոսնեֆտ» ընկերության հրավերով, որը հուսով է, որ իտալական գործընկերները նույնպես ներդրում կունենան «Նաիրիտի» վերագործարկման նախագծում:
«Pirelli»-ի աշխարհում ավտոմեքենաների անվադողեր արտադրող մեծությամբ 5-րդ ընկերությունն է: Այն ունի 24 գործարան աշխարհի 13 երկրում: Բացի անվադողերի արտադրությունից՝ իտալական ընկերությունը զբաղվում է նաև ռետինատեխնիկական արդյունաբերության համար նոր տեխնոլոգիաների ու սարքավորումների մշակմամբ:
Ենթադրվում է, որ հենց վերջին ուղղությամբ էլ կընթանա համագործակցությունը «Ռոսնեֆտի» հետ, եթե ռուսական ընկերությունը վերջնականապես որոշի ստանձնել «Նաիրիտի» կառավարումը:
Թերթի հավաստի աղբյուրների փոխանցմամբ՝ Մաքսային միությանը Հայաստանի անդամակցության վերաբերյալ Սերժ Սարգսյանի հայտարարությունից հետո «Ռոսնեֆտն» առավել վճռական է տրամադրված և ՀՀ կառավարությունից «պահանջում է գործարանն իրեն հանձնել»՝ առանց կուտակված պարտքերի:
Հոդվածն ամբողջությամբ՝ կարդացեք «168 ժամ»-ի այսօրվա համարում:
