ՌԴ ՆԳՆ քրեական հետախուզության գլխավոր վարչության աշխատակիցները ձերբակալել են «օրենքով գող» Ուլֆատ Տագիևին՝ Ռուֆո Գյանջինսկի մականունուվ: Այս մասին տեղեկացնում է «Ռոսբալտը»:
Նրան կասկածում են 2012թ. «քրեական հեղինակություն» Իլգար Ջաբրայիլովի սպանության մեջ, որը ամենաազդեցիկ «օրենքով գողերից» մեկի՝ Ասլան Ուսոյանի (Դեդ Հասան) անվտանգության ծառայության ղեկավարն էր:
Իրավապահները կասկածներ ունեն, որ Տագիևը առնչություն ունի նաև Դեդ Հասանի սպանության մեջ:
ՌԴ ՆԳՆ աշխատակիցները Մոսկվայի Անվտանգության դաշնային ծառայության ու «Ռիս» հատուկ ստորաբաժանման աջակցությամբ Տագիևին ձերբակալել են Մոսկվայի հարավարևելյան շրջանում:
Ուժայինների օպերացիան տեղի է ունեցել այն ժամանակ, երբ Տագիևը հանդիպել է մի խումբ՝ հիմնականում ազգությամբ ադրբեջանցի գանգստերների հետ:
Նա նախ ներկայացրել է կեղծ անձնագիր, սակայն ոստիկանության բաժանմունքում հայտնել է, որ իր իսկական անունը Ուլֆատ Տագիև է:
«Ես գող եմ»,- ասել է նա իրեն ձերբակալած ուժայիններին: Հարցին՝ ինչպե՞ս են նրան անվանում հանցագործ աշխարհում, պատասխանել է՝ «Ռուֆո Գյանջինսկի»:
Նրան ոչ պաշտոնական զրույցից հետո ուղարկել են քննչական մեկուսարան:
Օպերատիվ մարմինների աշխատակիցների տեղեկություններով՝ նա (Ուլֆատն այդ ժամանակ դեռ «օրենքով գող» չէր) Մոսկվայում 2012թ. ապրիլին սպանել է «քրեական հեղինակություն» Իլգար Ջաբրայիլովին (մականունը՝ Դանաբաշ):
Ըստ ՌԴ ՆԳՆ-ի հաղորդման՝ Ռուֆոն մասնակցել է 2013թ. հունվարին Դեդ Հասանի դեմ հարձակմանը, նրան հետևել է, կազմակերպել վարձու մարդասպանի աշխատանքը, օգնել վերջինիս թաքնվել հանցագործության վայրից:
Ինչպես «Ռոսբալտին» հայտնել է իրավապահ մարմիններում աղբյուրը, Տագիևը Հաջի Ելցուևի ու «Խրոմոյ» մականունով ադրբեջանցու հետ (ձերբակալվել է 2012թ. ու գտնվում է կալանքի տակ) եղել են «օրենքով գող» Ռովշան Ջանիևի (Ռովշան Լենքորանսկի) ՝ Դեդ Հասանի գլխավոր հակառակորդներից մեկի մերձավոր շրջապատից:
Միայն այս եռյակին է վստահել չափազանց կասկածամիտ Լենքորանսկին, ու հենց նրանք են կազմակերպել «պատվերով» սպանությունների մեծ մասը:
Ուլֆատը ծնվել է 1981թ.՝ Ադրբեջանի Գյանջա քաղաքում: 2000թ. նրա նկատմամբ Ադրբեջանում հետախուզում է հայտարարվել, ինչից հետո նա հաստատվել է Մոսկվայում:
