Ռուսաստանի հատուկ ներկայացուցիչ Միխայիլ Մարգելովը Դովիլում Մեծ ութնյակի գագաթնաժողովից անմիջապես հետո մեկնել է Լիբիա՝ Ռուսաստանի միջնորդական առաջարկները կողմերին ներկայացնելու համար: Այս մասին հաղորդել է նախագահ Դմիտրի Մեդվեդևը G8-ի հավաքից հետո կայացած մամլո ասուլիսի ժամանակ: «Ռուսաստանի ներկայացուցիչն Աֆրիկայում՝ Մարգելովը, անմիջապես մեկնում է Բենղազի»,- ասել է Մեդվեդևը: Այս մասին հաղորդում է ITAR-TASS գործակալությունը:
Նա հավելել է, որ բանակցությունները վարվելու են երկու կողմերի հետ, սակայն Տրիպոլիի դեպքում որոշ խնդիրներ կան. «Կարծում եմ, որ ճիշտ կլիներ, որ նա մեկնի Բենղազի, սակայն Տրիպոլիի հարցում… այնտեղ իրավիճակն ավելի բարդ է»,- ասել է Մեդվեդևը՝ չմանրամասնելով, թե ինչ նկատի ունի:
Մեդվեդևը նաև շեշտել է, որ Մուամար Քադաֆիի հրաժարականի դեպքում Ռուսաստանը պատրաստ չէ նրան ապաստան տրամադրել, սակայն այդպիսի երկրներ կգտնվեն. «Քադաֆիի հրաժարականը, իմ տեսակետից, կարևոր նշանակություն չունի: Սակայն եթե դա տեղի ունենա, այն օգտակար կլինի երկրի համար. կքննարկենք, թե ինչ է պետք անել: Միջազգային հանրությունը նրան (Քադաֆիին.- 1in.am) չի տեսնում Լիբիայի առաջնորդի դերում: Պետք է քննարկել, թե ո՛ր երկիրը հրաժարականի դեպքում ապաստան կտրամադրի Քադաֆիին»,- ասել է ՌԴ նախագահը:
Երեկ ԱՄՆ նախագահ Բարաք Օբամայի անվտանգության հարցերով խորհրդականի տեղակալ Բեն Ռադսը, ով Օբամայի հետ գտնվում է Լեհաստանում, հայտարարել է, որ ԱՄՆ-ն պաշտպանում է Ռուսաստանի միջնորդական գործունեությունը Լիբիայում. «Կան պայմանավորվածություններ այն մասին, որ Լիբիայի ժողովուրդն ավելի լավ ապագայի է արժանի: Մենք սերտորեն կհամագործակցենք Ռուսաստանի հետ, որը բանակցություններ է վարելու լիբիացիների հետ»,- ասել է Ռոդսը: Այս մասին հաղորդում է Reuters գործակալությունը:
