Վանաձորի քաղաքապետ Մամիկոն Ասլանյանն այս պահին ավագանու նիստ է անցկացրել։
Հիշեցնենք. այն բանից հետո, ինչ հոկտեմբերի 10-ին փակ գաղտնի քվեարկությամբ Ասլանյանն ընտրվեց Վանաձորի քաղաքապետ, ավագանու նիստերը բոյկոտում են «Լուսավոր Հայաստան», «Բարգավաճ Հայաստան» և «Հայկական վերածնունդ» կուսակցությունների ավագանու անդամները, որպեսզի բացահայտվեն Ասլանյանի օգտին քվեարկած 4 դասալիքները։
Նիստն արտահերթ է, օրակարգում 10-ից ավելի հարց է տեղ գտել, այդ թվում՝ Վանաձոր համայնքի ավագանու կանոնակարգն ընդունելը։
Վանաձորի ավագանու «Լուսավոր Հայաստան» խմբակցության ղեկավար Քրիստ Մարուքյանը «Առաջին լրատվական»-ի հետ զրույցում նշեց, որ նիստն ապօրինի է, իրավազոր չէ, քանի որ մասնակցում է ավագանու ընդամենը 15 անդամ (ՀՀԿ և ՀՅԴ). «Օրենքի խախտմամբ է նիստ անցկացվում։ Իրենք հղում են կատարում օրենքի 64-րդ հոդվածին, որ իբր կարող են 9 հոգով որոշում կայացնել, ու եթե կարող են որոշում կայացնել, կարող են նաև նիստ գումարել։ Բայց նիստն ապօրինի է, քանի որ օրենքում հստակ ասվում է, որ նիստն իրավազոր լինելու համար պետք է օրենքով սահմանված թվի կեսից ավելին ներկա լինի, իսկ դա ավագանու 17 անդամն է»,- ասաց Մարուքյանը՝ հավելելով, որ բոյկոտողներից ոչ ոք նիստին չի ներկայացել։
Մարուքյանը շարունակում է. «Եթե իրենց տրամաբանությամբ՝ օրենքը թույլ է տալիս, ապա նման նիստ կարող էին նախկինում էլ գումարել, ինչո՞ւ չէին անում։ Գործ ունենք վախի հետ, որովհետև ապրիլի 10-ին լրանում է ավագանու նիստերի չգումարման 6 ամիսը, որի պարագայում ավագանու լիազորությունները դադարում են, և նոր ընտրություններ են անցկացվում։ Հիմա որպեսզի որևէ կերպ շրջանցեն այդ կարգավորումը, փորձում են նիստ գումարել, բայց դա որևէ իրավական հիմք չունի, ապօրինի է»։
Ընդգծենք, որ Մամիկոն Ասլանյանը նաև Լոռու մարզի Հանրապետական կուսակցության քարոզչության պատասխանատուն է։
