Թուրքական Hürriyet Daily News and Economic Review թերթին տված հարցազրույցում Թուրքիայի մշակույթի և զբոսաշրջության նախարար էրթուղրուլ Գյունայն անդրադարձել է Կարսի՝ հայ-թուրքական բարեկամությունը խորհրդանշող հուշարձանի ապամոնտաժմանը.
«Ես իմ ափսոսանքն եմ հայտնում այդ հուշարձանի ապամոնտաժման համար: Բոլոր նրանք, ովքեր քննադատում էին հուշարձանի ապամոնտաժումը, փչացրին ողջ գործընթացը: Փոխանակ գործընթացը հանդարտեցնելու, նրանք առավել «բորբոքեցին» այս խնդրի շուրջ ծավալված կրքերը: Այս հարցը քաղաքականացվել էր, տեղի բնակիչներն էլ շովինիստական քննարկումներ էին կազմակերպում:
Օրինակ՝ մենք թույլատրեցինք Աղթամարի Սուրբ Խաչ եկեղեցում պատարագի անցկացումը: Եթե եկեղեցու գմբեթին խաչի տեղադրման հարցը ևս մեկ անգամ քաղաքականացվեր, ապա մենք հաստատապես չէինք կարողանալու այն տեղադրել իր տեղում»:
Հիշեցենք, որ այս տարվա հունվարին էրթուղրուլ Գյունայը Կարսի հուշարձանի պատճառով ընկել էր հիմար վիճակի մեջ:
Հունվարի սկզբին Սարիղամիշի ճակատամարտի տարելիցի կապակցությամբ Կարս այցելած վարչապետ էրդողանը հայ-թուրքական բարեկամությունը խորհրդանշող հուշարձանն անվանեց «այլանդակ» ու հրահանգեց ապամոնտաժել այն, ինչի համար արժանացավ մեծ քննադատության:
Գյունայը փորձել էր պաշտպանել Էրդողանին՝ նշելով, թե վերջինս ոչ թե Կարսի հուշարձանն էր «այլանդակ» անվանել, այլ նրա շրջակայքում գտնվող հյուղակները:
Սակայն Գյունայի այս խոսքերից շատ չանցած՝ Էրդողանը վերահաստատել էր, որ հենց հուշարձանն է «այլանդակ» համարել, ինչից հետո Գյունայը հայտնվել էր տհաճ իրավիճակում:
