«Վազգեն Սարգսյանը տալիս էր հնարավորություն, որ մարդիկ աշխատեն, բայց սահման էր դնում, էդ սահմանը անցնել չէր կարելի. Վազգենն իր շուրջը ստեղծեց մի խումբ, բայց էդ խմբավորումներն այնպես արեցին, որ ուղղակի շատ մարդիկ թողեցին ու գնացին. Անդրեասյանը գնաց, Տեր-Գրիգորյանցը գնաց»,- Շուշիի և Արցախյան պատերազմի հերոս Արկադի Տեր-Թադևոսյանը՝ Կոմանդոսը, օրերս «ԳԱԼԱ»-ի հետ զրույցում այսպես էր արտահայտվել Վազգեն Սարգսյանի մասին և խոսել նրա սխալների մասին: Այս թեմայով Hayeli.am-ը զրուցել է Ազգային հերոս, «Սասուն» ջոկատի հրամանատար, ԱԺ նախկին պատգամավոր Սասուն Միքայելյանի հետ:
-Պարոն Միքայելյան, կիսո՞ւմ եք Կոմանդոսի այն համոզմունքը, որ գեներալներ Նորատ Տեր-Գրիգորյանցը, Հրաչ Անդրեասյանը գնացել են հենց Վազգեն Սարգսյանի պատճառով: Առհասարակ, ինչո՞ւ հանկարծ Կոմանդոսը հիմա հիշեց Վազգեն Սարգսյանին:
-Ես նախևառաջ հետևյալ հարցով եմ ուզում դիմել Կոմանդոսին՝ ինչո՞ւ այն ժամանակ, երբ Վազգեն Սարգսյանը կենդանի էր, Կոմանդոսը նման հարցադրումներ չէր դնում: Վազգեն Սարգսյանի օրոք զինվորականների արտագաղթ չի եղել , Կոմանդոսն ասում է՝ իբր Վազգեն Սարգսյանի պատճառով են այդ մարդիկ հեռացել երկրից, բայց հավանաբար Կոմանդոսը նկատի է ունեցել նրանց գործը: Գեներալ Անդրեասյանին անձամբ ես եմ ճանաչել՝ Լաչինից և Քելբաջարից, նա մի քանի օպերացիաներ է տապալել, որի պատճառով Լաչինում մենք բազմաթիվ զոհեր տվեցինք: Քելբաջարի օպերացիայի ժամանակ էլ ներկա է եղել և այդ մասին կհավաստի Միքայել Հարությունյանը, Անդրեասյանը օպերացիան մշակեց, բայց այդպես էլ արդյունքի չհասանք, երբ թուրքերը Քելբաջարը հետ էին վերցրել: Իրավացի է, մարդկանց հնարավորություն է տրվել, բայց երբ նրանք չեն կարողացել նորմալ դրսևորեն իրենց, բնական է, որ պետք է չաշխատեին: Վազգեն Սարգսյանը լինելով պաշտպանության նախարար բնական է, որ որոշումները պետք է ինքը կայացներ:
-Համաձա՞յն եք Կոմանդոսի հետ, որ Վազգեն Սարգսյանն այն մարդն է, ումից հիմա խոսելն արգելված է, պիտի ասես, որ ինքը ինչ արել է, ճիշտ է արել:
-Արկադի Իվանիչը պետք է մի բան հասկանա, որ Վազգեն Սարգսյանի ժամանակ է ազատագրվել Արցախ աշխարհը և այսօրվա մեր նորագույն պատմության ամենամնայուն արժեքը հենց ազատագրված տարածքներն են: Ես դիմում եմ Արկադի Իվանիչին՝ եթե մարդիկ մահացել են, նրանց հետևից մի խոսեք: Ես գիտեմ Արկադի Իվանիչն ով է եղել, Վազգեն Սարգսյանը՝ ով: Եթե ինքն այդքան մտահոգ է այս պետությամբ և Վազգեն Սարգսյանն էլ ինչ-որ «սխալներ» է թույլ տվել… Ինչո՞ւ ինքը չի մեղադրում Ռոբերտ Քոչարյանին, Սերժ Սարգսյանին, թե նրանց էլ մի 20 տարի հետո է պատրաստվում քննադատել:Ես կուզենայի Արկադի Տեր-Թադևոսյանը պատասխանի իմ մի հարցին՝ ինքը երբևէ Ռոբերտ Քոչարյանին տեսե՞լ է մարտի դաշտում, թող կանգնի և ասի, շատ է ասում, որ պատերազմի ակունքներում ինքն է եղել, բայց լռում է, կենդանության օրոք չի կարող ասի՞, թող ասի: Ինչ է՝ այսօրվա իշխանություննե՞րն են հնարավորություն տալիս գործելու, կայանալու: Իսկ Վազգեն Սարգսյանը, իսկապես, մեզ գործելու հնարավորություն է տվել, անգամ Ռուսաստանից են սպաներ եկել Հայաստան: Վազգեն Սարգսյանն արել է այն, ինչի արդյունքում ազատագրել ենք Արցախ աշխարհը: Կոմոնդոսը թող իմանա, որ ոչ մի բարոյական իրավունք չունի Վազգեն Սարգսյանի հետևից նրան քննադատելու:
Հարցազրույցն ամբողջությամբ կարդացեք hayeli.am-ում
