Հունվարի 18-ին բլոգեր Ալեքսանդր Լապշինը Բելառուսում Իսրայելի հյուպատոս Յուլիա Ռաչինսկի-Սպիվակովայի ներկայությամբ ստորագրել է նամակ՝ ուղղված Ադրբեջանի նախագահին։ Այս մասին հայտնում է RIA Novosti-ն։
Հյուպատոսի խոսքով՝ նամակում Լապշինը ներողություն է խնդրել իր գործողությունների համար, որոնք կատարել է միամտաբար։ Հյուպատոսը հաստատել է նամակը և Բաքվում Բելառուսի դեսպանատան միջոցով հանձնել Ադրբեջանի նախագահի աշխատակազմին։
Դիվանագետը նշել է նաև, որ Լապշինի մայրը, ով հանդիսանում է Իսրայելի քաղաքացի է և բնակվում այնտեղ, խնդրել է Իլհամ Ալիևին ներում շնորհել իր որդուն։ Հյուպատոսի խոսքով՝ Իսրայելի դիվանագիտական առաքելությունն իր բոլոր գործողությունները համակարգում է Ռուսաստանի դեսպանատան հետ, քանի որ Լապշինը նաև ՌԴ քաղաքացի է։
Երեկ հաղորդվել էր, որ Բելառուսի գլխավոր դատախազի տեղակալի կայացրած որոշման համաձայն` Ալեքսանդր Լապշինին կհանձնեն Ադրբեջանին, որտեղ նրան քրեական պատասխանատվության կենթարկեն «պետությունների դեմ հրապարակային կոչեր» և «Ադրբեջանի Հանրապետության պետական սահմանի անօրինական հատում» հոդվածներով:
Ալեքսանդր Լապշինն այցելել էր Լեռնային Ղարաբաղ ու իր բլոգում պատմել այդ ուղևորության մասին, քննադատաբար արտահայտվել Ադրբեջանի ղեկավարության մասին։ Այնուհետև նա մեկնել էր Բելառուս, որտեղ նրան կալանավորել էին։
