Առաջիկայում Ռոբերտ Քոչարյանը հանդես կգա հարցազրույցով և կպատասխանի բոլոր հետաքրքրող հարցերին: Այս մասին «Առաջին լրատվական»-ի հետ զրույցում ասաց Ռոբերտ Քոչարյանի գրասենյակի ղեկավար Վիկտոր Սողոմոնյանը՝ անդրադառնալով հարցին, թե ինչպես է երկրորդ նախագահը վերաբերվում նախընտրական գործընթացներին և ինչ մասնակցություն կունենա:
Վիկտոր Սողոմոնյանին հիշեցրինք դեռ երկու տարի առաջ սահմանադրական փոփոխությունների հետ կապված մեկնաբանությունը. «Եթե Ռոբերտ Քոչարյանը իրոք վերստին ձգտի ստանձնել երկրի ղեկավարի դիրքը, ապա Սահմանադրության փոփոխման և հանրապետության նախագահի ինստիտուտի թուլացման պարագան մեծ նշանակություն չի ունենա: Նոր իրավիճակում Ռոբերտ Քոչարյանը կարող է 2017 թվականին իր գլխավորած ցուցակով մասնակցել խորհրդարանական ընտրություններին, փորձել ստանալ ժողովրդի քվեն և ստանձնել երկրի փաստացի ղեկավարի պաշտոնը: Ռոբերտ Քոչարյանի հանդեպ նույնիսկ կտրուկ բացասական վերաբերմունք ունեցող գործիչները հրապարակայնորեն արձանագրում են այն հանգամանքը, որ ընտրություններին նրա մասնակցությունը ամբողջովին կփոխի ներքաղաքական դասավորությունը»:
Հետաքրքրվեցինք, թե այս առումով արդյոք հիմա քննարկվո՞ւմ է նման հարց: «Խնդրում եմ իմ հարցազրույցը նորից կարդաք, կտեսնեք՝ ինչ կարգի պարզաբանում եմ տվել և ինչի վերաբերյալ: Այն ժամանակ խոսքն այն մասին էր, որ սահմանադրական փոփոխությունները խոչընդոտում են քաղաքականություն վերադառնալուն: Ես էլ ասում էի՝ չկա նման խոչընդոտ. այն ժամանակ դրա մասին էր խոսքը, ոչ թե ընտրություններին մասնակցելու»,- ասաց նա:
Վիկտոր Սողոմոնյանը նշեց, որ հարցազրույցի բազմաթիվ առաջարկներ ունեն. «Հարցազրույցի առաջարկներից որևէ մեկը կընդունենք, կարծում եմ՝ բոլոր հետաքրքրող հարցերին կպատասխանենք»:
Արդյոք հունվարի՞ն կլինի հարցազրույցը՝ հարցին էլ պատասխանեց. «Առաջիկայում, չեմ կարծում, որ շատ ուշ կլինի»:
