Բրիտանական Reuters լրատվական գործակալության փոխանցմամբ՝ ԱՄՆ Կոնգրեսը Սենատի ու Ներկայացուցիչների պալատի համատեղ նիստի արդյունքներով պաշտոնապես հաստատել է ԱՄՆ նախագահի պաշտոնում Դոնալդ Թրամփի և ԱՄՆ փոխնախագահի պաշտոնում Մայքլ Փենսի ընտրվելը։
Ընտրությունների արդյունքների մասին հայտարարել է Սենատում նախագահող ԱՄՆ փոխնախագահ Ջոզեֆ Բայդենը։ Նա մերժել է Դեմոկրատական կուսակցության մի շարք ներկայացուցիչների առարկությունները, որոնք պահանջել են չեղյալ հայտարարել ընտրությունների արդյունքները այն բանի հիման վրա, որ ընտրական գործընթացին միջամտել է Ռուսաստանը։
Բայդենը, ամփոփելով նիստի արդյունքները, հայտարարել է. «Ահա և վերջ»։ Դոնալդ Թրամփը ստացել է ընտրիչների 304 քվե, իսկ նրա մրցակից, դեմոկրատ Հիլարի Քլինթոնը՝ 227 քվե։ Թրամփի երդմնակալության արարողությունը նշանակված է հունվարի 20-ին։
