Ադրբեջանագետ Սարգիս Ասատրյանը լրագրողների հետ զրույցում ասաց, որ Պուտինի այցը Ադրբեջան հետաքրքիր նպատակներ էր հետապնդում: Ինչո՞ւ պետք է Վլադիմիր Պուտինը Ադրբեջան այցելեր ընտրությունների նախօրեին: Ադրբեջանագետի կարծիքով` պրոիշխանական շատ փորձագետներ և ԶԼՄ-ներ հակված են այն կարծիքին, որ սա Իլհամ Ալիևին օժանդակության ժեստ էր ՌԴ նախագահի կողմից: Սա Ադրբեջանում վերածեցին լավ ինքնափիարի. տարբեր փորձագետներ ու մասնագետներ հայտարարեցին, թե, տեսեք, Իլհամ Ալիևն այնքան լավն է, որ Ռուսաստանի նախագահը եկել և սատարում է նրան ընտրություններից առաջ:
«Ադրբեջանում սա վերածեցին մեծ շոուի: Տարբեր փորձագետներ ու մասնագետներ սկսեցին հայտարարություններ անել, թե, տեսեք, Իլհամ Ալիևն այնքան լավն է, որ Ռուսաստանի նախագահը եկել, սատարում է նրան ընտրություններից առաջ: Սակայն Բոլորս գիտենք, որ Ռուսաստանն իր շահն է հետապնդում տարածաշրջանում: Այս առումով Ադրբեջանը առանցքային պետություն է, քանի որ խոշոր էներգակիրների մատակարար է, նավթագազային ոլորտում վերածվում է լուրջ խաղացողի»,- նշեց Սարգիս Ասատրյանը:
Ըստ նրա` Վլադիմիր Պուտինը փորձեց ամեն ինչ անել, որ հնարավորինս մեծ բաժնեմաս կորզի Ադրբեջանի պետական նավթային ընկերությունից «Ռոսնեվթի» միջոցով: Սա հետապնդում էր մի նպատակ. որ Ադրբեջանին հետ պահի Ռուսաստանը շրջանցող ենթակառուցվածքների կառուցումից Եվրոպայի հետ: Սարգիս Ասատրյանի խոսքով` այդ ծրագրերը վաղուց կան, շատ մասնագետներ հակված են մտածելու, որ Պուտինը փորձում էր Բաքվին ներքաշել Եվրասիական միության մեջ:
«Կարելի է ասել, որ չնայած արտաքնապես լավ հարաբերություններին, ընկերության և եղբայրության մասին հայտարարություններին, կան շատ ցավոտ խնդիրներ երկու երկրների միջև: Ինչ խոսք, Բաքուն այժմ դժվար ցանկանա Եվրասիական միությանը հարել: Քանի որ լուրջ պրոյեկտներ ունի Արևմուտքի հետ, այսօր մի ուրիշ խնդիր էլ կա` ռազմական համագործակցությունը երկու երկրների միջև. դա հասնում է միլիարդավոր դոլարների: Սա նույնպես պատահական չէ»,- նշեց ադրբեջանագետը: Նրա կարծիքով` Բաքուն ինչ-որ կերպ դիվերսիֆիկացնում է իր զենքի մատակարարումը, Ադրբեջանը շատ երկրներից է այն գնում: Դեռ չլուծված խնդիրներ կան:
Ռուսաստանի կողմից օժանդակությունը Իլհամ Ալիևին, ըստ ադրբեջանագետի, կախված է այն բանից, թե Բաքուն ինչպես իրեն կդրսևորի մոտ ժամանակներում, արդյոք հաշվի կառնի՞ Ռուսաստանի տարածաշրջանային շահերը, թե՞ ոչ:
