Նյու Յորքում հյուրանոցները շատ թանկ են, իսկ դիզայներ Գրեգ Քլոենը հաճախ է այցելում այդ քաղաք և ամեն անգամ կացարան ունենալու խնդրի առջև կանգնում: Այս մասին հաղորդում է Daily News-ը:
Որոշելով լուծել այդ խնդիրը՝ Քլոենը 2000 դոլարով ձեռք է բերել հսկայական մի աղբաման: Դրանից հետո դիզայները մետաղե արկղում «կառուցել է» խոհանոց, լոգարան, դրել մահճակալ և նույնիսկ՝ սոլյարի: Նա իր նոր կացարանին նաև անիվներ է ամրացրել՝ այն շարժական դարձնելու համար:
Իր նոր «բնակարանի» տանիքին նա 23 լիտր տարողությամբ խմելու ջրի տարա է տեղադրել, այնտեղ կարելի է նաև պահել զուգարանի և լոգանքի համար անհրաժեշտ ջուրը: Յուրօրինակ բնակարանը նաև հոսանք ունի:
Այսպիսով, դիզայներն այլևս կախված չէ անդադար թանկացող բնակարանների վարձակալման և հյուրանոցների գումարներից:
Աղբամանը կանաչ գույնի է, իսկ դրա ներքին հարդարանքը՝ կարմիր և սև: Բացի այդ, «բնակարանն» ունի փոքրիկ բար և բաց մանղալ, ուստի դրա առջև ամենուր կարելի է խորոված անել:
