Эхо Москвы ռադիոկայանը պատրաստվում է Եվրախորհրդի և այլ միջազգային կառույցների առջև բարձրացնել գլխավոր խմբագրի տեղակալ Սերգեյ Բունտմանի հարցը, որին Ադրբեջանն ընդգրկել է իր «սև ցուցակում»: Այս մասին հայտարարել է ռադիոկայանի գլխավոր խմբագիր Ալեքսեյ Վենեդիկտովը:
Ադրբեջանի ԱԳՆ-ն Սերգեյ Բունտմանին իր «սև ցուցակում» էր ներառել այն բանից հետո, երբ Բունտմանն այցելել էր Ստեփանակերտ և հարցազրույց ունեցել Լեռնային Ղարաբաղի Հանրապետության (ԼՂՀ) նախագահ Բակո Սահակյանի հետ:
Մայիսի 23-ին Ալեքսեյ Վենեդիկտովը Эхо Москвы-ի եթերում հայտարարել է. «Հաջորդ լրագրողը, որը կգործուղվի Ադրբեջան, կլինի Սերգեյ Ալեքսանդրովիչ Բունտմանը: Սա ևս մեկ անգամ կարող եմ կրկնել մեզ լսող ադրբեջանցի գործընկերների համար»:
Հիշեցնենք, որ ապրիլի վերջին ԼՂՀ այցելեց հայ ժողովրդի բարեկամ, բրիտանացի խորհրդարանական Քերոլայն Քոքսը: Նրա այցից առաջ Ադրբեջանի արտգործնախարարության մամլո ծառայության ղեկավար Էլհան Պոլուխովը հայտարարեց, թե առանց Ադրբեջանի «թույլտվության» ԼՂՀ այցելող յուրաքանչյուր օտարազգի հայտնվում է իրենց «սև ցուցակի» մեջ:
Ի դեպ, դրանից առաջ էլ Ադրբեջանը «սև ցուցակում» էր ընդգրկել մի խումբ կիպրացի թուրքերի, որոնք միջազգային համաժողովի շրջանակում այցելել էին ԼՂՀ մայրաքաղաք Ստեփանակերտ։
