Ն.Ս.Օ.Տ.Տ. Գարեգին Բ Ծայրագույն Պատրիարք և Ամենայն Հայոց Կաթողիկոսի օրհնությամբ Մայր Աթոռ Սուրբ Էջմիածնի Հրատարակչական բաժինը լույս է ընծայել «Սուրբ Հայրերի վարքն ու կենցաղավարությունը» ժողովածուի առաջին հատորը:
Այս մասին հայտնում են Մայր Աթոռ Սուրբ Էջմիածնի տեղեկատվական համակարգից։
Ժողովածուի ներկա աշխարհաբար թարգմանությունն իրականացվել է միայն ժողովածուի՝ «Վարք սրբոց հարանց եւ քաղաքավարութիւնք նոցին ըստ կրկին թարգմանութեան նախնեաց»-ի (Վենետիկ, 1855) կորիզը կազմող «Բանք եւ պատմութիւնք հարանց» հատվածի համար: Թարգմանությունը կատարվել է Հրատարակչական բաժնի տնօրեն Հոգեշնորհ Տ. Շահե ծայրագույն վարդապետ Անանյանի, Սիրանուշ (Նանա) Գրիգորյանի և Վաղարշակ Թանգամյանի կողմից:
19 գլուխներում ամփոփված վանական-անապատական բարոյախոսությունը յուրահատուկ թեմատիկ ուղեցույց է բոլոր նրանց համար, ովքեր փափագում են անապատական հայրերի հոգևոր փորձառությանը ծանոթանալու և դրանք առօրյա կյանքում իբրև լուսաբանող օրինակներ ունենալու:
Յուրաքանչյուր գլխում կատարվել են համապատասխան պարբերությունների թվաբաժանումներ՝ ընթերցանությունն ավելի դյուրացնելու համար: Թարգմանվել են թե առաջին, թե երկրորդ թարգմանության բնագրերը, ինչպես նաև՝ երկրորդ թարգմանության «մնացորդք»-ը՝ իբրև «Պահպանված հատվածներ երկրորդ թարգմանությունից»: Թարգմանիչների բուն նպատակն է եղել ընթերցողին հասանելի դարձնել գրաբար թարգմանությամբ մեզ հասած այս ժողովածուի բոլոր հատվածները:
Գիրքը հրատարակվել է «Սարգիս Գաբրիելյան» հիմնադրամի մեկենասությամբ:
Հրատարակչական բաժնի կողմից հրատարակվել է նաև 2017 թվականի սեղանի օրացույցը: Ամենօրյա ժամատախտակներին զուգահեռ այն բացատրություններ է տալիս բոլոր տոների և սրբոց հիշատակության օրերի վերաբերյալ:
