Քաղաքական դաշտում 2017թ. խորհրդարանական ընտրություններին ընդառաջ քաղաքական դաշտում նոր կուսակցություններ, նոր շարժումներ են ի հայտ գալիս: «Առաջին լրատվական»- ի հետ զրույցում քաղտեխնոլոգ Վիգեն Հակոբյանը նշեց, որ ընտրությունների մոտենալուն պես ոչ իշխանական քաղաքական ուժերը, ռեալ գնահատելով իրենց ռեուրսները, փորձում են ինչ-որ ձևաչափերով հանդես գալ, դաշինքներ կազմել և այլն:
Նրա խոսքով՝ Հայաստանում կա ևս մեկ ուղղություն՝ աշխարհաքաղաքական. «Այս նախընտրական պրոցեսներում կլինեն համախմբումներ, որոնք հստակ պրոարևմտյան, պրոռուսական ուղղվածություններ կունենան: Իշխանություններին ևս ձեռնտու է, որ խորհրդարանում ընդդիմությունը ներկայացված լինի»:
Քաղտեխնոլոգի դիտարկմամբ՝ թե՛ փորձառու կուսակցությունները, թե՛ նորաստեղծները եկել են այն եզրակացության, որ միայնակ գործելու ռեսուրս չկա:
Անդրադառնալով Գագիկ Ծառուկյանի՝ մեծ քաղաքականություն հնարավոր վերադարձին, քաղտեխնոլոգը կարծիք հայտնեց, որ նրա վերադարձը կարող է զգալի ազդեցություն ունենալ քաղաքական դաշտի վրա, որովհետև որոշակի հաշվարկներ կարող են վերանայվել:
«Բողոքական ընտրազանգվածի լյումպենիզացված տարրը Հայաստանում տարեցտարի ավելանում է, դա այն խումբն է, որը գնում է ցանկացած քաղաքական ուժի հետևից, որն, իր կարծիքով, ավելի ռադիկալ կարող է հանդես գալ, որը խորհրդանշում է ինչ-որ ուժ, Գագիկ Ծառուկյանի հնարավոր վերադարձը կարող է նրանց հիասթափացնել այն առումով, որ Ծառուկյանը հեղափոխությանը դեմ է, համենայնդեպս իր վերջին շրջանի ելույթներում խոսում է այդ մասին: Այսինքն՝ իրենց պատկերացմամբ՝ Ծառուկյանը գիտակցվում էր որպես հեղափոխության սիմվոլ, հիմա նա բացառում է նման հնարավորությունները, և եթե վերադառնում է, նշանակում է՝ այլ կարգախոսներով է հանդես գալիս: Կարծում եմ՝ այս առումով բողոքական ընտրազանգվածը կարող է որոշակի հիասթափություններ ունենալ և փորձել նոր առաջնորդներ գտնել»,- նշեց Վ. Հակոբյանը:
Նրա գնահատմամբ՝ Ծառուկյանի վերադարձը տեսականորեն հնարավոր է, և ավեի շատ հնարավոր է, որ Ծառուկյանի վերադարձը անկուսակացական շարժման տեսքով կլինի, և ինքն, անկասկած, այդ շարժման առաջնորդը կլինի: «Գոնե այս առումով նույն քաղաքական գետը չի մտնի: Այլ հարց է, որ ԲՀԿ-ում եթե համոզվեն, որ Ծառուկյանը լրջորեն տրամադրված է վերադառնալ, ապա կպայքարեն, որպեսզի հենց ԲՀԿ-ով վերադառնա: Բոլորը հասկանում են, որ դա ավելի շատ ձայն կբերի»,- նշեց քաղտեխնոլոգը:
Մանրամասները՝ տեսանյութում:
