Այսօր Երևանի ավագանու «Բարև Երևան» խմբակցությունը ՀՀ վարչական դատարան ներկայացավ «Երևանի քաղաքապետի 19.07.2013թ. թիվ 3660-Ա որոշումն առ ոչինչ ճանաչելու և 19.07.2013թ. թիվ 3661-Ա որոշումն անվավեր ճանաչելու հայցադիմումով:
Խմբակցության անդամ Անահիտ Բախշյանը լրագրողների հետ զրույցում նշեց, որ քաղաքապետարանի այս որոշումներն իրավաչափ չեն, ավելին՝ տրոլեյբուսի թանկացումն առավել քան անհիմն է, քանի որ տրոլյեբուսի սպասարկումը որևէ կերպ քաղաքապետարանի իրավասությունների մեջ չի մտնում: Նա նշեց, որ թեև դատական համակարգից մեծ չեն սպասելիքները, սակայն բոլոր դատարաններ կդիմեն, այդ թվում՝ Սահմանադրական դատարան:
«Մեր նպատակն է դատարանի վճռով հիմնավորել, որ քաղաքապետն այս որոշումները կայացրել է ոչ իրավաչափ հիմքով, որ քաղաքապետարանի կողմից թույլ են տրվել անթիվ-անհամար խախտումներ»,- ասաց մյուս բանախոս Ստյոպա Սաֆարյանը:
Նա նշեց, որ քաղաքապետը խախտել է մի շարք հիմնարար դրույթներ՝ ավտոբուսների և միկրոավտոբուսների հետ կապված: «Այն որոշումները, որոնք ստորագրել է Տարոն Մարգարյանը, դրանք պետք է ուժի մեջ մտնեին ոչ թե ստորագրման պահին կամ դրա հաջորդ օրը, այլ դրա հրապարակումից տասը օր հետո։ Սա նշանակում է հուլիսի քսանից մինչև հուլիսի քսանչորսը հինգ օր շարունակ անօրինական դրամահավաք է իրականացվել միկրոավտոբուսների և ավտոբուսների կողմից, հետևաբար, որոշումները ուժի մեջ մտնելու հետ կապված, կա ընթացակարգային լուրջ խախտում»,- ասաց Ստյոպա Սաֆարյանը:
Հարցին, թե այս պահի դրությամբ ԲՀԿ հայցադիմումի ներկայացնողը հանդիսանո՞ւմ է «Բարև Երևանը», Ստյոպա Սաֆարյանը պատասխանեց, որ հայցվոր ներկայանում է «Բարև Երևան» դաշինքը, բայց ԲՀԿ խմբակցության ղեկավարին տեղեկացրել են իրենց որոշման մասին, ինչին ի պատասխան՝ նրանք ասել են, որ ԲՀԿ-ն նիստ հրավիրելու անհրաժեշտություն ունի, և եթե որոշի, ԲՀԿ-ն նույնպես կարող է միանալ։ Այսինքն` դեռևս այլ սուբյեկտներ էլ կարող են միանալ, նաև կարող են միանալ քաղաքացիներ՝ որպես հայցվորներ: Ս. Սաֆարյանը նշեց, որ կան այդպիսի քաղաքացիներ,ովքեր շահագրգռված են միանալ հայցին: Նա հավելեց, որ վարչական դատարան դիմումը բաղկացած է ինը էջից:
Դատարանում «Բարև Երևանի» ներկայացուցիչը կլինի Արթուր Գասպարյանը, կլինեն նաև այլ փաստաբաններ:
Լուսանկարը՝ PanARMENIAN Photo-ի
