Ճարտարապետների միության նախագահ Մկրտիչ Մինասյանը «Առաջին լրատվական» – ի հետ զրույցում անդրադառնալով տպարանի շենքի քանդմանը, նշեց, որ պայթեցման եղանակով քանդման աշխատանքներն իրականացվում են, որպեսզի շատ արագ կատարվեն: «Խնդիրն այն է, որ այդ տեղը խիտ բնակեցված է, և պետք է իրազեկված լինեին: Քաղաքի կենտրոնում այնքան էլ ընդունելի մեթոդ չէ պայթեցման եղանակով շենքի քանդումը այն առումով, որ մարդիկ սթրեսի մեջ են ընկնում: Բայց աշխարհում ընդունված է քաղաքներում ընդհանրապես ոչ թե 2-3 հարկանի, այլ 40-50 հարկանի շենքեր պայթեցման եղանակով քանդելը, բայց նախապես իրազեկելով բոլորին:
Մ. Մինասյանի հավաստմամբ՝ նախագծով ծրագրված է եղել, որ շենքի ճակատային հատվածը պետք է պահպանվի, և այդպես էլ արվել է:
«Ամբողջ աշխարհում բոլոր շինությունները չեն, որ մտնում են պետության պահպանության տակ, և բոլոր շինությունները չեն, որ բացառիկ արժեք ունեն, բայց կան շինություններ, որոնք միջավայրային են, հետաքրքիր լուծումներ ունեն, ինչիսին որ տպարանի շենքն է, և դրանք պետք է պահպանել միջավայրի մեջ: Այդպիսի շինությունները քանդելով Երևանը կամաց-կամաց կորցնում ենք»,- նշեց Մ. Մինասյանը:
Ճարտարապետների միության նախագահը նաև նշեց. Շատ ուրախ եմ, որ վարչապետը արագ է արձագանքել, զգում ես, որ մտահոգ մարդ կա և անողոք կլինի նրանց դեմ, ովքեր կփորձեն խուսափել պատասխանատվությունից»:
Մանրամասները՝ տեսանյութում:
