Կաննում երեկ ավարտվեց հանրահայտ կինոփառատոնը, որն այս տարի աչքի ընկավ բազմաթիվ սկանդալներով: Անշուշտ, դրանցից ամենաարտառոցը դանիացի կինոռեժիսոր Լարս ֆոն Թրիերի հակասեմական արտահայտություններն էին:
Սակայն կինոփառատոնը բարեհաջող ավարտ ունեցավ, իսկ 2011 թ. լավագույն ֆիլմ ճանաչվեց ամերիկացի կինոռեժիսոր Թերենս Մալիքի «Կենաց ծառը»: Կինոփառատոնի այս տարվա ժյուրիի նախագահ Ռոբերտ դե Նիրոն այս ընտրությունը բացատրեց հետևյալ կերպ. «Չեմ կարող պատմել բոլոր մանրամասները, սակայն մենք զգացինք, որ այս ֆիլմը, նրա ծավալն ու մտահղացումն առավելագույնն էին համապատասխանում «Ոսկե արմավը» ստանալուն: Մեզ համար դժվար էր որոշում կայացնել, քանի որ մյուս ֆիլմերն էլ էին շատ լավը, չնայած բացարձակապես տարբեր էին: Մենք ստիպված էին փոխզիջումային տարբերակ գտնել»,- ասել է նա:
Կինոփառատոնի՝ կարևորությամբ երկրորդ մրցանակը ստացել են երկու աշխատանք՝ բելգիացի Դարդեն եղբայրների «Հեծանիվով տղան» և թուրք կինոռեժիսոր Նուրի Բիլգե Ջեյլանի «Մի անգամ Անատոլիայում» ֆիլմերը:
Անմրցանակ չի մնացել նաև սկանդալային Լարս ֆոն Թրիերը: Նրա «Մելամաղձություն» ֆիլմի դերակատար Քրիստեն Դանսթը «Ոսկե արմավ» է ստացել «Կանացի լավագույն դեր» անվանակարգում: «Տղամարդու լավագույն դեր» անվանակարգում հաղթել է Ժան Դյուժարդեզը «Արտիստը» ֆիլմի համար: Ժյուրիի մրցանակը բաժին է հասել ֆրանսիացի կինոռեժիսոր Մայվեն լե Բեսկոյի «Փայլը» ֆիլմին:
Լավագույն ռեժիսոր է ճանաչվել մեկ այլ դանիացի մասնագետ՝ Նիկոլաս Վինդինգ Ռեֆը «Դրայվ» ֆիլմի համար: «Ոսկե տեսախցիկը» բաժին է հասել արգենտինացի օպերատոր Պաբլո Ջորջելլիին «Ակացիա ֆիլմի համար:
Կինոքննադատների մրցանակին է արժանացել «Ոսկե արմավի» ամենահավանական հաղթող համարվող ֆինն ռեժիսոր Ակի Կաուրիսմյակին «Հավր» ֆիլմի համար: Այս ռեժիսորը նույնպես հայտնվել էր սկանդալի կենտրոնում՝ կոչ անելով իր ֆիլմը չցուցադրել Իսրայելում:
